Holy Bible project logo icon
FREE OFF-line Bible for Android Get Bible on Google Play QR Code Android Bible
Holy Bible
for Android

is a powerful Bible Reader which has possibility to download different versions of Bible to your Android device.

Bible Verses
for Android

Bible verses includes the best bible quotes in more than 35 languages

Pear Bible KJV
for Android

is an amazing mobile version of King James Bible that will help you to read this excellent book in any place you want.

Pear Bible BBE
for Android

is an amazing mobile version of Bible in Basic English that will help you to read this excellent book in any place you want.

Pear Bible ASV
for Android

is an amazing mobile version of American Standard Version Bible that will help you to read this excellent book in any place you want.

BIBLE VERSIONS / Библия / Ветхий Завет / Чи́сла

Библия - Церковнославянская

Леѵі́тъ Чи́сла Второзако́нїе

Глава 1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36

1 И҆ речѐ валаа́мъ къ вала́кѹ: сози́жди мнѣ̀ здѣ̀ се́дмь тре́бищъ, и҆ ѹ҆гото́вай мнѣ̀ здѣ̀ се́дмь телцє́въ и҆ се́дмь ѻ҆внѡ́въ.

2 И҆ сотворѝ вала́къ, ѩ҆́коже речѐ є҆мѹ̀ валаа́мъ: и҆ вознесѐ телца̀ и҆ ѻ҆вна̀ на тре́бище.

3 И҆ речѐ валаа́мъ къ вала́кѹ: ста́ни ѹ҆ тре́бы своеѧ̀, и҆ пойдѹ̀, а҆́ще ѩ҆ви́тсѧ мнѣ̀ бг҃ъ въ срѣ́тенїе, и҆ сло́во, є҆́же мнѣ̀ ѹ҆ка́жетъ, повѣ́мъ тебѣ̀. И҆ ста̀ вала́къ ѹ҆ тре́бы своеѧ̀.

4 И҆ валаа́мъ и҆́де вопроси́ти бг҃а, и҆ и҆́де прѧ́мѡ: и҆ ѩ҆ви́сѧ бг҃ъ валаа́мѹ. И҆ речѐ къ немѹ̀ валаа́мъ: се́дмь тре́бищъ и҆згото́вихъ и҆ возложи́хъ телца̀ и҆ ѻ҆вна̀ на тре́бище.

5 И҆ вложѝ бг҃ъ сло́во во ѹ҆ста̀ валаа́мѹ и҆ речѐ: возврати́всѧ къ вала́кѹ та́кѡ глаго́ли.

6 И҆ возврати́сѧ къ немѹ̀: ѻ҆́нъ же стоѧ́ше ѹ҆ всесожже́нїй свои́хъ, и҆ всѝ кнѧ҄зи мѡа҄вли съ ни́мъ: и҆ бы́сть дх҃ъ бж҃їй на не́мъ.

7 И҆ воспрїи́мъ при́тчѹ свою̀ речѐ: ѿ месопота́мїи приведе́ мѧ вала́къ ца́рь мѡа́вль, ѿ го́ръ восто́чныхъ, глаго́лѧ: грѧдѝ, проклени́ ми ї҆а́кѡва, и҆ грѧдѝ, проклени́ ми ї҆и҃лѧ:

8 что̀ прокленѹ̀, є҆гѡ́же не клене́тъ гд҇ь; и҆лѝ что̀ ѕло̀ рекѹ̀, є҆гѡ́же не ѕлосло́витъ бг҃ъ;

9 ѩ҆́кѡ ѿ верха̀ го́ръ ѹ҆зрю̀ є҆го̀ и҆ ѿ хѡ́лмъ проѹразѹмѣ́ю є҆го̀: сѐ, лю́дїе є҆ди́ни населѧ́тсѧ и҆ со ѩ҆зы҄ки не вмѣнѧ́тсѧ:

10 кто̀ и҆зслѣ́дитъ сѣ́мѧ ї҆а́кѡвле; и҆ кто̀ и҆зочте́тъ со́нмы ї҆и҃лѧ; да ѹ҆́мретъ дѹша̀ моѧ̀ въ дѹша́хъ првдныхъ, и҆ бѹ́ди сѣ́мѧ моѐ, ѩ҆́коже сѣ́мѧ и҆́хъ.

11 И҆ речѐ вала́къ къ валаа́мѹ: что̀ сотвори́лъ є҆сѝ мѝ; на проклѧ́тїе вра҄гъ мои́хъ призва́хъ тѧ̀, и҆ сѐ, благослови́лъ є҆сѝ (ѧ҆̀) благослове́нїемъ.

12 И҆ речѐ валаа́мъ къ вала́кѹ: не є҆ли҄ка ли вло́житъ бг҃ъ во ѹ҆ста̀ моѧ҄, сїѐ сохраню̀ глаго́лати;

13 И҆ речѐ къ немѹ̀ вала́къ: пойдѝ є҆щѐ со мно́ю на мѣ́сто и҆́но, съ негѡ́же не ѹ҆́зриши и҆́хъ ѿтѹ́дѹ, но ра́звѣ ча́сть нѣ́кѹю и҆́хъ ѹ҆́зриши, всѣ́хъ же не ѹ҆́зриши, и҆ проклени́ ми и҆̀хъ ѿтѹ́дѹ.

14 И҆ поѧ̀ є҆го̀ на стра́жѹ села̀, на ве́рхъ и҆сте́санагѡ, и҆ созда̀ та́мѡ се́дмь тре́бищъ, и҆ возложѝ телца̀ и҆ ѻ҆вна̀ на тре́бище.

15 И҆ речѐ валаа́мъ къ вала́кѹ: ста́ни ѹ҆ тре́бы своеѧ̀, а҆́зъ же пойдѹ̀ вопроси́ти бг҃а.

16 И҆ срѣ́те бг҃ъ валаа́ма, и҆ вложѝ сло́во во ѹ҆ста̀ є҆мѹ̀ и҆ речѐ: возврати́сѧ къ вала́кѹ, и҆ рече́ши сїѧ҄.

17 И҆ возврати́сѧ къ немѹ̀: ѻ҆́нъ же стоѧ́ше ѹ҆ всесожже́нїй свои́хъ, и҆ всѝ кнѧ҄зи мѡа҄вли съ ни́мъ. И҆ речѐ є҆мѹ̀ вала́къ: что̀ гл҃а гд҇ь;

18 И҆ воспрїи́мъ при́тчѹ свою̀, речѐ: воста́ни, вала́къ, и҆ послѹ́шай, внѹшѝ свидѣ́тель, сы́не сепфѡ́ровъ:

19 не ѩ҆́кѡ человѣ́къ бг҃ъ коле́блетсѧ, нижѐ ѩ҆́кѡ сы́нъ человѣ́ческїй и҆змѣнѧ́етсѧ: то́й гл҃аше, не сотвори́тъ ли; рече́тъ, и҆ не пребѹ́детъ ли;

20 сѐ, благословлѧ́ти приведе́нъ є҆́смь: благословлю̀, и҆ не ѿвращѹ̀:

21 не бѹ́детъ трѹда̀ во ї҆а́кѡвѣ, нижѐ ѹ҆́зритсѧ болѣ́знь во ї҆и҃ли: гд҇ь бг҃ъ є҆гѡ̀ съ ни́мъ, сла́ва ца́рскаѧ на не́мъ:

22 бг҃ъ и҆зведы́й є҆го̀ и҆з̾ є҆гѵ́пта, ѩ҆́коже сла́ва є҆диноро́га въ не́мъ:

23 нѣ́сть бо вражбы̀ во ї҆а́кѡвѣ, нижѐ волхвова́нїѧ во ї҆и҃ли: во вре́мѧ нарече́тсѧ ї҆а́кѡвѹ и҆ ї҆и҃лю, что̀ соверши́тъ бг҃ъ:

24 сѐ, лю́дїе ѩ҆́кѡ льви҄чища воста́нѹтъ, и҆ ѩ҆́кѡ ле́въ вознесе́тсѧ: не ѹ҆́снетъ, до́ндеже снѣ́стъ ло́въ и҆ кро́вь посѣ́ченыхъ и҆спїе́тъ.

25 И҆ речѐ вала́къ къ валаа́мѹ: ни клѧ́твами мнѣ̀ кленѝ и҆̀хъ, нижѐ благослове́нїемъ благословѝ и҆̀хъ.

26 И҆ ѿвѣща́въ валаа́мъ, речѐ къ вала́кѹ: не рѣ́хъ ли тѝ, глаго́лѧ: сло́во, є҆́же а҆́ще возгл҃етъ бг҃ъ, сїѐ сотворю̀;

27 И҆ речѐ вала́къ къ валаа́мѹ: грѧдѝ, поймѹ́ тѧ на мѣ́сто и҆́но, а҆́ще ѹ҆го́дно бѹ́детъ бг҃ѹ, и҆ проклени́ ми и҆̀хъ ѿтѹ́дѹ.

28 И҆ поѧ̀ вала́къ валаа́ма на ве́рхъ фогѡ́ра, простира́ющасѧ въ пѹсты́ню.

29 И҆ речѐ валаа́мъ къ вала́кѹ: сози́жди мнѣ̀ здѣ̀ се́дмь тре́бищъ, и҆ ѹ҆гото́вай мнѣ̀ здѣ̀ се́дмь телцє́въ и҆ се́дмь ѻ҆внѡ́въ.

30 И҆ сотворѝ вала́къ, ѩ҆́коже речѐ є҆мѹ̀ валаа́мъ: и҆ вознесѐ телца̀ и҆ ѻ҆вна̀ на тре́бище.

<< ← Prev Top Next → >>