1 Тлѣ́ю дѹ́хомъ носи́мь, прошѹ́ же гро́ба и҆ не ѹ҆лѹча́ю.
2 Молю̀ болѣ́знѹѧ, и҆ что̀ сотворю̀; ѹ҆крадо́ша же мѝ и҆мѣ́нїе чѹжді́и.
3 Кто́ є҆сть се́й; рѹко́ю мое́ю свѧ́занъ да бѹ́детъ.
4 ѩ҆́кѡ се́рдце и҆́хъ сокры́лъ є҆сѝ ѿ мѹ́дрости, сегѡ̀ ра́ди да не вознесе́ши и҆́хъ.
5 Ча́сти возвѣсти́тъ ѕлѡ́бы: ѻ҆́чи же на сынѣ́хъ и҆ста́ѧста.
6 Положи́лъ же мѧ̀ є҆сѝ въ при́тчѹ во ѩ҆зы́цѣхъ, смѣ́хъ же бы́хъ и҆̀мъ.
7 Ѡ҆слѣпо́ста бо ѿ гнѣ́ва ѻ҆́чи моѝ, повоева́нъ бы́хъ вельмѝ ѿ всѣ́хъ:
8 чѹ́до ѡ҆б̾ѧ̀ и҆́стинныхъ ѡ҆ се́мъ, пра́ведникъ же на беззако́нника да воста́нетъ:
9 да содержи́тъ же вѣ́рный пѹ́ть сво́й, чи́стый же рѹка́ма да прїи́метъ де́рзость.
10 Но ѻ҆ба́че всѝ належи́те и҆ прїиди́те, не бо̀ ѡ҆брѣта́ю въ ва́съ и҆́стины.
11 Дні́е моѝ преидо́ша въ тече́нїи, расторго́шасѧ же ѹ҆́дове се́рдца моегѡ̀.
12 Но́щь въ де́нь преложи́хъ: свѣ́тъ бли́з̾ ѿ лица̀ тмы̀.
13 А҆́ще бо стерплю̀, а҆́дъ мѝ є҆́сть до́мъ, въ сѹмра́цѣ же постла́сѧ мѝ посте́лѧ.
14 Сме́рть назва́хъ ѻ҆тца̀ моего̀ бы́ти, ма́терь же и҆ сестрѹ́ ми гно́й.
15 Гдѣ̀ ѹ҆́бѡ є҆щѐ є҆́сть мѝ наде́жда, и҆лѝ блага҄ѧ моѧ҄ ѹ҆зрю̀;
16 и҆лѝ со мно́ю во а҆́дъ сни́дѹтъ, и҆лѝ вкѹ́пѣ въ пе́рсть сни́демъ. |