1 Сѹди́ ми, гд҇и, ѩ҆́кѡ а҆́зъ неѕло́бою мое́ю ходи́хъ: и҆ на гд҇а ѹ҆пова́ѧ не и҆знемогѹ̀.
2 И҆скѹси́ мѧ, гд҇и, и҆ и҆спыта́й мѧ̀, разжжѝ ѹ҆трѡ́бы моѧ҄ и҆ се́рдце моѐ.
3 ѩ҆́кѡ мл҇ть твоѧ̀ пред̾ ѻ҆чи́ма мои́ма є҆́сть, и҆ благоѹгоди́хъ во и҆́стинѣ твое́й.
4 Не сѣдо́хъ съ со́нмомъ сѹ́етнымъ, и҆ со законопрестѹ́пными не вни́дѹ.
5 Возненави́дѣхъ це́рковь лѹка́внѹющихъ, и҆ съ нечести́выми не сѧ́дѹ.
6 Ѹ҆мы́ю въ непови́нныхъ рѹ́цѣ моѝ, и҆ ѡ҆бы́дѹ же́ртвенникъ тво́й, гд҇и,
7 є҆́же ѹ҆слы́шати мѝ гла́съ хвалы̀ твоеѧ̀ и҆ повѣ́дати всѧ҄ чѹдеса̀ твоѧ҄.
8 Гд҇и, возлюби́хъ бл҃голѣ́пїе до́мѹ твоегѡ̀ и҆ мѣ́сто селе́нїѧ сла́вы твоеѧ̀.
9 Да не погѹби́ши съ нечести́выми дѹ́шѹ мою̀ и҆ съ мѹ҄жи крове́й живо́тъ мо́й,
10 и҆́хже въ рѹкѹ̀ беззакѡ́нїѧ, десни́ца и҆́хъ и҆спо́лнисѧ мзды̀.
11 А҆́зъ же неѕло́бою мое́ю ходи́хъ: и҆зба́ви мѧ̀, гд҇и, и҆ поми́лѹй мѧ̀.
12 Нога̀ моѧ̀ ста̀ на правотѣ̀: въ цр҃квахъ благословлю́ тѧ, гд҇и. |