1 Դաւիթի (Սաղմոս)։ Մի բարկանար չարերի վերայ. Մի նախանձիր անօրէնութիւն գործողներին։
2 Որովհետեւ նորանք խոտի պէս շուտով կկտրուին, եւ կանաչ խոտի պէս կթառամին։
3 Տիրոջը յուսա եւ բարի արա. Բնակուիր երկրումը եւ հետեւիր ճշմարտութեանը։
4 Ցնծացիր Տէրով, եւ նա կտայ քեզ քո սրտի ուզածները։
5 Տիրոջը յանձնիր քո ճանապարհը՝ եւ նորան յուսա. Եւ նա կկատարէ։
6 Եւ քո արդարութիւնը դուրս կհանէ լոյսի պէս, եւ քո իրաւունքը՝ կէս օրուան պէս։
7 Համբերիր Տիրոջը եւ սպասիր նորան. մի բարկանար այն մարդի ճանապարհը յաջողուելիս՝ որ իր չար խորհուրդները կատարում է։
8 Դադարիր բարկութիւնից, եւ թող տուր սրտմտութիւնը. մի բարկանար՝ որ չար գործես։
9 Որովհետեւ չարերը կսատկեն, բայց Տիրոջն սպասողները երկիրը կժառանգեն։
10 Դեռ մի քիչ ժամանակ էլ, եւ ամբարիշտը չկայ. Եւ երբոր նորա տեղին մտիկ տաս՝ նա չկայ։
11 Բայց խոնարհները երկիրը կժառանգեն եւ կուրախանան խաղաղութեան առատութիւնովը։
12 Ամբարիշտը չար է մտածում արդարի դէմ. Եւ իր ատամները կրճտեցնում է նորա վերայ։
13 Տէրը ծիծաղում է նորա վերայ. Որովհետեւ տեսնում է՝ որ նորա օրը եկել է։
14 Սուրը հանում են ամբարիշտները եւ իրանց աղեղները լարում, որ խեղճին ու աղքատին վայր գցեն եւ սպանեն ճանապարհով ուղիղներին։
15 Բայց նորանց սուրն իրանց սրտի մէջ կմտնէ, եւ նորանց աղեղները կփշրուին։
16 Արդարի քիչ բանը լաւ է քան թէ շատ ամբարիշտների ճոխութիւնը։
17 Որովհետեւ ամբարիշտների բազուկները կփշրուին, իսկ արդարներին հաստատում է Տէրը։
18 Տէրը ճանաչում է արդարների օրերը, եւ նորանց ժառանգութիւնը յաւիտեան կլինի։
19 Նորանք չեն ամաչիլ չար ժամանակում, եւ սովի օրերումը կկշտանան։
20 Որովհետեւ ամբարիշտները կկորչեն, եւ Տիրոջ թշնամիները կոչնչանան ինչպէս արտերի պարարտութիւնը, կփչանան ծուխի պէս։
21 Ամբարիշտը փոխ է առնում եւ չէ վճարում, բայց արդարը ողորմած է եւ տալիս է։
22 Որովհետեւ նորա օրհնուածները երկիրը կժառանգեն, բայց նորա անիծուածները կսատկեն։
23 Տիրովն է հաստատվում մարդիս գնացքը, եւ նա հաւանում է նորա ճանապարհին։
24 Թէեւ վայր ընկնի՝ չի կործանուիլ, որովհետեւ Տէրը նորա ձեռքիցը բռնում է։
25 Ես երեխայ էի եւ ծերացայ՝ եւ չտեսայ արդարին երեսից թողուած, եւ ոչ նորա զաւակին, որ հաց մուրանայ։
26 Արդարը ամեն օր ողորմած է եւ փոխ է տալիս, եւ նորա զաւակը օրհնուած է։
27 Յետ քաշուիր չարիցը եւ բարիք արա, եւ յաւիտեան կմնաս։
28 Որովհետեւ Տէրն իրաւունք է սիրում եւ իր սուրբերին չէ թողում. Նորանք յաւիտեան պահպանվում են, բայց ամբարիշտների զաւակը կսատկի։
29 Արդարները երկիրը կժառանգեն, եւ յաւիտեան կբնակուին նորանում։
30 Արդարի բերանը իմաստութիւն է խօսում. Եւ նորա լեզուն իրաւունք է զրուցում։
31 Իր Աստուծոյ օրէնքն իր սրտումն է. Նորա քայլերը չեն տատանուիլ։
32 Ամբարիշտը դիտում է արդարին, եւ ման է գալիս՝ որ սպանէ նորան։
33 Բայց Տէրը նորան չի թողիլ նորա ձեռքին, եւ չի դատապարտիլ նորան՝ երբոր նա դատուի։
34 Սպասիր Տիրոջը եւ պահիր նորա ճանապարհը, եւ նա կբարձրացնէ քեզ՝ որ երկիրը ժառանգես. Եւ կտեսնես ամբարիշտները սատակելիս։
35 Ես ամբարիշտը տեսայ գոռոզ եւ տեղը հաստատ ինչպէս լայնատարած դալար ծառ.
36 Բայց մին էլ անցնելիս, ահա չկար նա. Ման եկայ նորան, եւ չգտնուեցաւ։
37 Իսկ արդարին մտիկ արա եւ ուղիղին տես. այսպիսի մարդի վերջը խաղաղութիւն է։
38 Բայց անիրաւներն իրար հետ մէկտեղ կսատակեն. Ամբարիշտների վերջը կորուստ է։
39 Եւ արդարների փրկութիւնը Տէրիցն է. նա նորանց զօրութիւնն է նեղութեան ժամանակում։
40 Եւ Տէրը կօգնէ նորանց եւ կազատէ նորանց. Կազատէ նորանց ամբարիշտներիցը եւ կփրկէ նորանց, որովհետեւ նորան են յուսացած։ |