1 Въ коне́цъ, ѡ҆ сынѣ́хъ коре́овыхъ, ѱало́мъ,
2 Всѝ ѩ҆зы́цы, восплещи́те рѹка́ми, воскли́кните бг҃ѹ гла́сомъ ра́дованїѧ:
3 ѩ҆́кѡ гд҇ь вы́шнїй стра́шенъ, цр҃ь ве́лїй по все́й землѝ:
4 покорѝ лю́ди на́мъ и҆ ѩ҆зы́ки под̾ но́ги на́ша:
5 и҆збра̀ на́мъ достоѧ́нїѧ своѐ, добро́тѹ ї҆а́кѡвлю, ю҆́же возлюбѝ.
6 Взы́де бг҃ъ въ воскликнове́нїи, гд҇ь во гла́сѣ трѹ́бнѣ.
7 По́йте бг҃ѹ на́шемѹ, по́йте: по́йте цр҃е́ви на́шемѹ, по́йте:
8 ѩ҆́кѡ цр҃ь всеѧ̀ землѝ бг҃ъ, по́йте разѹ́мнѡ.
9 Воцр҃и́сѧ бг҃ъ над̾ ѩ҆зы҄ки: бг҃ъ сѣди́тъ на пр҇то́лѣ ст҃ѣ́мъ свое́мъ.
10 Кнѧ҄зи лю́дстїи собра́шасѧ съ бг҃омъ а҆враа́млимъ: ѩ҆́кѡ бж҃їи держа́внїи землѝ ѕѣлѡ̀ вознесо́шасѧ. |