1 Въ коне́цъ, въ пѣ́снехъ, ѱало́мъ а҆са́фѹ, пѣ́снь ко а҆ссѷрі́анинѹ,
2 Вѣ́домъ во ї҆ѹде́и бг҃ъ: во ї҆и҃ли ве́лїе и҆́мѧ є҆гѡ̀.
3 И҆ бы́сть въ ми́рѣ мѣ́сто є҆гѡ̀, и҆ жили́ще є҆гѡ̀ въ сїѡ́нѣ.
4 Та́мѡ сокрѹшѝ крѣ́пѡсти лѹкѡ́въ, ѻ҆рѹ́жїе и҆ ме́чь и҆ бра́нь.
5 Просвѣща́еши ты̀ ди́внѡ ѿ го́ръ вѣ́чныхъ.
6 Смѧто́шасѧ всѝ неразѹ́мнїи се́рдцемъ: ѹ҆снѹ́ша сно́мъ свои́мъ, и҆ ничто́же ѡ҆брѣто́ша всѝ мѹ́жїе бога́тства въ рѹка́хъ свои́хъ.
7 Ѿ запреще́нїѧ твоегѡ̀, бж҃е ї҆а́ковль, воздрема́ша всѣ́дшїи на ко́ни.
8 Ты̀ стра́шенъ є҆сѝ, и҆ кто̀ противоста́нетъ тебѣ̀; ѿто́лѣ гнѣ́въ тво́й.
9 Съ нб҃сѐ слы́шанъ сотвори́лъ є҆сѝ сѹ́дъ: землѧ̀ ѹ҆боѧ́сѧ и҆ ѹ҆молча̀,
10 внегда̀ воста́ти на сѹ́дъ бг҃ѹ, сп҇тѝ всѧ҄ крѡ́ткїѧ землѝ.
11 ѩ҆́кѡ помышле́нїе человѣ́ческое и҆сповѣ́стсѧ тебѣ̀, и҆ ѡ҆ста́нокъ помышле́нїѧ пра́зднѹетъ тѝ.
12 Помоли́тесѧ и҆ воздади́те гд҇еви бг҃ѹ на́шемѹ: всѝ, и҆̀же ѡ҆́крестъ є҆гѡ̀, принесѹ́тъ да́ры
13 стра́шномѹ и҆ ѿе́млющемѹ дѹ́хи кнѧзе́й, стра́шномѹ па́че царе́й земны́хъ. |