1 Въ коне́цъ, ѡ҆ точи́лѣхъ, ѱало́мъ а҆са́фѹ,
2 Ра́дѹйтесѧ бг҃ѹ помо́щникѹ на́шемѹ, воскли́кните бг҃ѹ ї҆а́кѡвлю:
3 прїими́те ѱало́мъ и҆ дади́те тѷмпа́нъ, ѱалти́рь красе́нъ съ гѹ́сльми:
4 вострѹби́те въ новом҇чїи трѹбо́ю, во бл҃гознамени́тый де́нь пра́здника ва́шегѡ:
5 ѩ҆́кѡ повелѣ́нїе ї҆и҃леви є҆́сть, и҆ сѹдба̀ бг҃ѹ ї҆а́ковлю.
6 Свидѣ́нїе во ї҆ѡ́сифѣ положѝ є҆̀, внегда̀ и҆зы́ти є҆мѹ̀ ѿ землѝ є҆гѵ́петскїѧ: ѧ҆зы́ка, є҆гѡ́же не вѣ́дѧше, ѹ҆слы́ша.
7 Ѿѧ́тъ ѿ бре́мене хребе́тъ є҆гѡ̀: рѹ́цѣ є҆гѡ̀ въ кошѝ порабо́тастѣ.
8 Въ ско́рби призва́лъ мѧ̀ є҆сѝ, и҆ и҆зба́вихъ тѧ̀: ѹ҆слы́шахъ тѧ̀ въ та́йнѣ бѹ́рнѣ: и҆скѹси́хъ тѧ̀ на водѣ̀ прерѣка́нїѧ.
9 Слы́шите, лю́дїе моѝ, и҆ засвидѣ́телствѹю ва́мъ, ї҆и҃лю, а҆́ще послѹ́шаеши менє̀:
10 не бѹ́детъ тебѣ̀ бо́гъ но́въ, нижѐ поклони́шисѧ бо́гѹ чѹжде́мѹ.
11 А҆́зъ бо є҆́смь гд҇ь бг҃ъ тво́й, и҆зведы́й тѧ̀ ѿ землѝ є҆гѵ́петскїѧ: разширѝ ѹ҆ста̀ твоѧ̀, и҆ и҆спо́лню ѧ҆̀.
12 И҆ не послѹ́шаша лю́дїе моѝ гла́са моегѡ̀, и҆ ї҆и҃ль не внѧ́тъ мѝ:
13 и҆ ѿпѹсти́хъ ѧ҆̀ по начина́нїємъ серде́цъ и҆́хъ, по́йдѹтъ въ начина́нїихъ свои́хъ.
14 А҆́ще бы́ша лю́дїе моѝ послѹ́шали менє̀, ї҆и҃ль а҆́ще бы въ пѹти҄ моѧ҄ ходи́лъ:
15 ни ѡ҆ чесо́мже ѹ҆́бѡ врагѝ є҆гѡ̀ смири́лъ бы́хъ, и҆ на ѡ҆скорблѧ́ющыѧ и҆̀хъ возложи́лъ бы́хъ рѹ́кѹ мою̀.
16 Вразѝ гд҇ни солга́ша є҆мѹ̀, и҆ бѹ́детъ вре́мѧ и҆́хъ въ вѣ́къ:
17 и҆ напита̀ и҆̀хъ ѿ тѹ́ка пшени́чна, и҆ ѿ ка́мене ме́да насы́ти и҆̀хъ. |