1 Бг҃ъ ста̀ въ со́нмѣ богѡ́въ, посредѣ́ же бо́ги разсѹ́дитъ.
2 Доко́лѣ сѹ́дите непра́вдѹ, и҆ ли́ца грѣ́шникѡвъ прїе́млете;
3 Сѹди́те си́рѹ и҆ ѹ҆бо́гѹ, смире́на и҆ ни́ща ѡ҆правда́йте:
4 и҆зми́те ни́ща и҆ ѹ҆бо́га, и҆з̾ рѹкѝ грѣ́шничи и҆зба́вите є҆го̀.
5 Не позна́ша, нижѐ ѹ҆разѹмѣ́ша, во тмѣ̀ хо́дѧтъ: да подви́жатсѧ всѧ҄ ѡ҆снова҄нїѧ землѝ.
6 А҆́зъ рѣ́хъ: бо́зи є҆стѐ, и҆ сы́нове вы́шнѧгѡ всѝ:
7 вы́ же ѩ҆́кѡ человѣ́цы ѹ҆мира́ете, и҆ ѩ҆́кѡ є҆ди́нъ ѿ кнѧзе́й па́даете.
8 Воскр҇нѝ, бж҃е, сѹдѝ землѝ: ѩ҆́кѡ ты̀ наслѣ́диши во всѣ́хъ ѩ҆зы́цѣхъ. |