1 Мл҇ть и҆ сѹ́дъ воспою̀ тебѣ̀, гд҇и:
2 пою̀ и҆ разѹмѣ́ю въ пѹтѝ непоро́чнѣ: когда̀ прїи́деши ко мнѣ̀; прехожда́хъ въ неѕло́бїи се́рдца моегѡ̀ посредѣ̀ до́мѹ моегѡ̀.
3 Не предлага́хъ пред̾ ѻ҆чи́ма мои́ма ве́щь законопрестѹ́пнѹю: творѧ́щыѧ престѹпле́нїе возненави́дѣхъ:
4 не прильпѐ мнѣ̀ се́рдце стропти́во: ѹ҆клонѧ́ющагосѧ ѿ менє̀ лѹка́ваго не позна́хъ.
5 Ѡ҆клевета́ющаго та́й и҆́скреннѧго своего̀, сего̀ и҆згонѧ́хъ: го́рдымъ ѻ҆́комъ и҆ несы́тымъ се́рдцемъ, съ си́мъ не ѩ҆дѧ́хъ.
6 Ѻ҆́чи моѝ на вѣ҄рныѧ землѝ, посажда́ти ѧ҆̀ со мно́ю: ходѧ́й по пѹтѝ непоро́чнѹ, се́й мѝ слѹжа́ше.
7 Не живѧ́ше посредѣ̀ до́мѹ моегѡ̀ творѧ́й горды́ню: глаго́лѧй непра́вєднаѧ не и҆справлѧ́ше пред̾ ѻ҆чи́ма мои́ма.
8 Воѹ́трїѧ и҆збива́хъ всѧ҄ грѣ҄шныѧ землѝ, є҆́же потреби́ти ѿ гра́да гд҇нѧ всѧ҄ дѣ́лающыѧ беззако́нїе. |