Библия, Ѿ лѹкѝ, Глава 3. is available here: https://www.bible.promo/chapters.php?id=10978&pid=44&tid=2&bid=85
Holy Bible project logo icon
FREE OFF-line Bible for Android Get Bible on Google Play QR Code Android Bible

Holy Bible
for Android

is a powerful Bible Reader which has possibility to download different versions of Bible to your Android device.

Bible Verses
for Android

Bible verses includes the best bible quotes in more than 35 languages

Pear Bible KJV
for Android

is an amazing mobile version of King James Bible that will help you to read this excellent book in any place you want.

Pear Bible BBE
for Android

is an amazing mobile version of Bible in Basic English that will help you to read this excellent book in any place you want.

Pear Bible ASV
for Android

is an amazing mobile version of American Standard Version Bible that will help you to read this excellent book in any place you want.

BIBLE VERSIONS / Библия / Новый Завет / Ѿ лѹкѝ

Библия - Церковнославянская

Ѿ ма́рка Ѿ лѹкѝ Ѿ ї҆ѡа́нна

Глава 1 2 3 4 5 6 7 8 9 10 11 12 13 14 15 16 17 18 19 20 21 22 23 24

1 Въ пѧ́тое же на́десѧте лѣ́то влады́чества тїве́рїа ке́сарѧ, ѡ҆блада́ющѹ понті́йскомѹ пїла́тѹ ї҆ѹде́ею, и҆ четвертовла́ствѹющѹ галїле́ею и҆́рѡдѹ, фїлі́ппѹ же бра́тѹ є҆гѡ̀ четвертовла́ствѹющѹ ї҆тѹре́ею и҆ трахѡні́тскою страно́ю, и҆ лѷса́нїю а҆вїлині́ею четвертовла́ствѹющѹ,

2 при а҆рхїере́и а҆́ннѣ и҆ каїа́фѣ, бы́сть гл҃го́лъ бж҃їй ко ї҆ѡа́ннѹ заха́рїинѹ сы́нѹ въ пѹсты́ни.

3 И҆ прїи́де во всю̀ странѹ̀ ї҆ѻрда́нскѹю, проповѣ́даѧ креще́нїе покаѧ́нїѧ во ѡ҆ставле́нїе грѣхѡ́въ:

Ѿ лѹкѝ 3:3 - John the Baptist Preaching
John the Baptist Preaching
4 ѩ҆́коже є҆́сть пи́сано въ кни́зѣ слове́съ и҆са́їи про҇ро́ка, глаго́люща: гла́съ вопїю́щаго въ пѹсты́ни: ѹ҆гото́вайте пѹ́ть гд҇нь: пра҄вы твори́те стєзѝ є҆гѡ̀:

5 всѧ́ка де́брь и҆спо́лнитсѧ, и҆ всѧ́ка гора̀ и҆ хо́лмъ смири́тсѧ: и҆ бѹ́дѹтъ стро́пѡтнаѧ въ пра҄ваѧ, и҆ ѻ҆́стрїи въ пѹти҄ гла҄дки:

6 и҆ ѹ҆́зритъ всѧ́ка пло́ть сп҇нїе бж҃їе.

7 Глаго́лаше же и҆сходѧ́щымъ наро́дѡмъ крести́тисѧ ѿ негѡ̀: порождє́нїѧ є҆хі́днѡва, кто̀ сказа̀ ва́мъ бѣжа́ти ѿ грѧдѹ́щагѡ гнѣ́ва;

8 Сотвори́те ѹ҆̀бо плоды̀ достѡ́ины покаѧ́нїѧ: и҆ не начина́йте глаго́лати въ себѣ̀: ѻ҆тца̀ и҆́мамы а҆враа́ма: глаго́лю бо ва́мъ, ѩ҆́кѡ мо́жетъ бг҃ъ ѿ ка́менїѧ сегѡ̀ воздви́гнѹти ча҄да а҆враа́мѹ.

9 Ѹ҆же́ бо и҆ сѣки́ра при ко́рени дре́ва лежи́тъ: всѧ́ко ѹ҆̀бо дре́во, не творѧ́щее плода̀ добра̀, посѣка́етсѧ и҆ во ѻ҆́гнь вмета́етсѧ.

10 И҆ вопроша́хѹ є҆го̀ наро́ди, глаго́люще: что̀ ѹ҆̀бо сотвори́мъ;

11 Ѿвѣща́въ же глаго́ла и҆́мъ: и҆мѣ́ѧй двѣ̀ ри҄зѣ, да пода́стъ не и҆мѹ́щемѹ: и҆ и҆мѣ́ѧй бра҄шна, та́кожде да твори́тъ.

12 Прїидо́ша же и҆ мы́тари крести́тисѧ ѿ негѡ̀, и҆ рѣ́ша къ немѹ̀: ѹ҆чи́телю, что̀ сотвори́мъ;

13 Ѻ҆́нъ же речѐ къ ни҄мъ: ничто́же бо́лѣе ѿ повелѣ́ннагѡ ва́мъ твори́те.

14 Вопроша́хѹ же є҆го̀ и҆ во́ини, глаго́люще: и҆ мы̀ что̀ сотвори́мъ; И҆ речѐ къ ни҄мъ: ни кого́же ѡ҆би́дите, ни ѡ҆клеветава́йте: и҆ дово́лни бѹ́дите ѡ҆брѡ́ки ва́шими.

15 Ча́ющымъ же лю́демъ, и҆ помышлѧ́ющымъ всѣ҄мъ въ сердца́хъ свои́хъ ѡ҆ ї҆ѡа́ннѣ, є҆да̀ то́й є҆́сть хр҇то́съ,

16 ѿвѣщава́ше ї҆ѡа́ннъ всѣ҄мъ, глаго́лѧ: а҆́зъ ѹ҆́бѡ водо́ю креща́ю вы̀: грѧде́тъ же крѣ́плїй менє̀, є҆мѹ́же нѣ́смь досто́инъ ѿрѣши́ти реме́нь сапѡгѹ̀ є҆гѡ̀: то́й вы̀ крести́тъ дх҃омъ ст҃ы́мъ и҆ ѻ҆гне́мъ:

17 є҆мѹ́же лопа́та въ рѹкѹ̀ є҆гѡ̀, и҆ ѡ҆треби́тъ гѹмно̀ своѐ, и҆ собере́тъ пшени́цѹ въ жи́тницѹ свою̀, пле́вы же сожже́тъ ѻ҆гне́мъ негаса́ющимъ.

18 Мнѡ́га же ѹ҆̀бо и҆ и҆́на, ѹ҆тѣша́ѧ благовѣствова́ше лю́демъ.

19 (За҄ 10.) И҆́рѡдъ же четвертовла́стникъ, ѡ҆блича́емъ ѿ негѡ̀ ѡ҆ и҆рѡдїа́дѣ женѣ̀ бра́та своегѡ̀, и҆ ѡ҆ всѣ́хъ, ѩ҆̀же сотворѝ ѕла҄ѧ и҆́рѡдъ,

20 приложѝ и҆ сїѐ над̾ всѣ́ми, и҆ затворѝ ї҆ѡа́нна въ темни́цѣ.

21 Бы́сть же є҆гда̀ кр҇ти́шасѧ всѝ лю́дїе, и҆ ї҆и҃сѹ кр҃щшѹсѧ и҆ молѧ́щѹсѧ, ѿве́рзесѧ не́бо,

22 и҆ сни́де дх҃ъ ст҃ы́й тѣле́снымъ ѡ҆́бразомъ, ѩ҆́кѡ го́лѹбь, на́нь: и҆ гла́съ съ небесѐ бы́сть, глаго́лѧ: ты̀ є҆сѝ сн҃ъ мо́й возлю́бленный, ѡ҆ тебѣ̀ бл҃говоли́хъ.

23 (За҄ 11.) И҆ то́й бѣ̀ ї҆и҃съ ѩ҆́кѡ лѣ́тъ три́десѧть начина́ѧ, сы́й, ѩ҆́кѡ мни́мь, сн҃ъ ї҆ѡ́сифовъ, и҆лі́евъ,

24 матѳа́товъ, леѵі́инъ, мелхі́инъ, ї҆анна́евъ, ї҆ѡ́сифовъ,

25 маттаѳі́евъ, а҆мѡ́совъ, наѹ́мовъ, є҆слі́мовъ, нагге́овъ,

26 маа́ѳовъ, маттаѳі́евъ, семеі́евъ, ї҆ѡ́сифовъ, ї҆ѹ́динъ,

27 ї҆ѡа́ннановъ, риса́евъ, зорова́велевъ, салаѳїи́левъ, нирі́евъ,

28 мелхі́евъ, а҆дді́евъ, кѡса́мовъ, є҆лмѡда́мовъ, и҆́ровъ,

29 ї҆ѡсі́евъ, є҆лїезе́ровъ, ї҆ѡрі́мовъ, матѳа́товъ, леѵі́инъ,

30 сѷмеѡ́новъ, ї҆ѹ́динъ, ї҆ѡ́сифовъ, ї҆ѡна́новъ, є҆лїакі́мовъ,

31 мелеа́евъ, маїна́новъ, маттаѳа́евъ, наѳа́новъ, дв҃довъ,

32 ї҆ессе́овъ, ѡ҆ви́довъ, воо́зовъ, салмѡ́новъ, наассѡ́новъ,

33 а҆мїнада́вовъ, а҆ра́мовъ, є҆срѡ́мовъ, фаре́совъ, ї҆ѹ́динъ,

34 ї҆а́кѡвль, ї҆саа́ковъ, а҆враа́мовъ, ѳа́ринъ, нахѡ́ровъ,

35 серѹ́ховъ, рага́вовъ, фале́ковъ, є҆ве́ровъ, сала́новъ,

36 каїна́новъ, а҆рфаѯа́довъ, си́мовъ, нѡ́евъ, ла́меховъ,

37 маѳѹса́левъ, є҆нѡ́ховъ, ї҆а́редовъ, малелеи́ловъ, каїна́новъ,

38 є҆нѡ́совъ, си́ѳовъ, а҆да́мовъ, бж҃їй.

<< ← Prev Top Next → >>