Holy Bible project logo icon
FREE OFF-line Bible for Android Get Bible on Google Play QR Code Android Bible
Holy Bible
for Android

is a powerful Bible Reader which has possibility to download different versions of Bible to your Android device.

Bible Verses
for Android

Bible verses includes the best bible quotes in more than 35 languages

Pear Bible KJV
for Android

is an amazing mobile version of King James Bible that will help you to read this excellent book in any place you want.

Pear Bible BBE
for Android

is an amazing mobile version of Bible in Basic English that will help you to read this excellent book in any place you want.

Pear Bible ASV
for Android

is an amazing mobile version of American Standard Version Bible that will help you to read this excellent book in any place you want.

BIBLE VERSIONS / Библия / Новый Завет / а҃ маккавей́скаѧ

Библия - Церковнославянская

А҆пока́лѷѱїсъ а҃ маккавей́скаѧ в҃ маккавей́скаѧ

Глава 1 2 3 4 5 6 7 8 9 10 11 12 13 14 15 16

1 И҆ воста̀ ї҆ѹ́да нарица́емый маккаве́й сы́нъ є҆гѡ̀ вмѣ́стѡ є҆гѡ̀.

2 И҆ помога́хѹ є҆мѹ̀ всѝ бра́тїѧ є҆гѡ̀ и҆ всѝ є҆ли́цы прилѣпи́шасѧ ко ѻ҆тцѹ̀ є҆гѡ̀, и҆ ѡ҆полча́хѹсѧ ѡ҆полче́нїемъ ї҆и҃ль съ весе́лїемъ.

3 И҆ распространѝ сла́вѹ лю́демъ свои҄мъ: и҆ ѡ҆блече́сѧ въ бронѧ̀ ѩ҆́кѡ и҆споли́нъ и҆ препоѧ́сасѧ ѻ҆рѹ́жїемъ свои́мъ бра́ннымъ, и҆ соста́ви ра҄ти, защища́ѧ ѡ҆полчє́нїѧ мече́мъ свои́мъ,

4 и҆ ѹ҆подо́бисѧ львѹ̀ въ дѣ́лѣхъ свои́хъ, и҆ ѩ҆́кѡ скѵ́менъ рыка́ющь въ лови́твѣ:

5 и҆ погна̀ беззакѡ́нныѧ и҆зслѣ́дѹѧй, и҆ смѹща́ющихъ лю́ди є҆гѡ̀ пожжѐ пла́менемъ.

6 И҆ слѧко́шасѧ беззако́ннїи ѿ стра́ха є҆гѡ̀, и҆ всѝ дѣ́лателє беззако́нїѧ смѧто́шасѧ, и҆ благопоспѣ́шно бы́ти спасе́нїе рѹко́ю є҆гѡ̀.

7 И҆ ѡ҆горчѝ цари҄ мнѡ́ги и҆ возвеселѝ ї҆а́кѡва въ дѣ́лѣхъ свои́хъ, и҆ да́же до вѣ́ка па́мѧть є҆гѡ̀ во благослове́нїе:

8 и҆ про́йде гра́ды ї҆ѹ҄дины, и҆ погѹбѝ нечести́выхъ ѿ ни́хъ, и҆ ѿвратѝ гнѣ́въ ѿ ї҆и҃лѧ,

9 и҆ и҆мени́тъ бы́сть да́же до послѣ́днихъ землѝ, и҆ собра̀ погиба́ющихъ.

10 А҆поллѡ́нїй же собра̀ ѩ҆зы́ки и҆ ѿ самарі́и си́лѹ ве́лїю, є҆́же ра́товати на ї҆и҃лѧ.

11 И҆ ѹ҆вѣ́да ї҆ѹ́да и҆ и҆зы́де во срѣ́тенїе є҆мѹ̀, и҆ поразѝ є҆го̀ и҆ ѹ҆бѝ того̀: и҆ падо́ша ѩ҆́звенїи мно́зи, а҆ про́чїи ѹ҆бѣго́ша.

12 И҆ взѧ̀ коры҄сти и҆́хъ, и҆ ме́чь а҆поллѡ́нїевъ ѿѧ̀ ї҆ѹ́да, и҆ бы́сть вою́ѧ и҆́мъ всѧ҄ дни҄.

13 И҆ ѹ҆слы́ша сирѡ́нъ нача́лникъ во́євъ сѵ́рскихъ, ѩ҆́кѡ собра̀ ї҆ѹ́да совокѹпле́нїе и҆ цр҃ковь вѣ́рныхъ съ ни́мъ и҆сходѧ́щихъ на бра́нь,

14 и҆ речѐ: сотворю̀ себѣ̀ и҆́мѧ, и҆ просла́влюсѧ въ ца́рствїи, и҆ поборю̀ ї҆ѹ́дѹ и҆ сѹ́щихъ съ ни́мъ и҆ ѹ҆ничижа́ющихъ сло́во царе́во.

15 (и҆ ѹ҆гото́васѧ) и҆ приложѝ є҆́же взы́ти: и҆ взы́де съ ни́мъ по́лкъ нечести́выхъ крѣ́покъ помощѝ є҆мѹ̀ и҆ сотвори́ти ѿмще́нїе на сынѣ́хъ ї҆и҃левыхъ.

16 И҆ прибли́жисѧ да́же до восхо́да веѳѡрѡ́нска: и҆ и҆зы́де ї҆ѹ́да во срѣ́тенїе є҆мѹ̀ въ ма́лѣ.

17 Е҆гда́ же ѹ҆ви́дѣша по́лкъ грѧдѹ́щїй во срѣ́тенїе и҆̀мъ, рѣ́ша ї҆ѹ́дѣ: ка́кѡ мо́жемъ въ ма́лѣ сѹ́ще ѡ҆полча́тисѧ проти́вѹ мно́жества толи́кагѡ крѣ́пкагѡ; и҆ мы̀ ѹ҆трѹжде́ни є҆смы̀ посто́мъ дне́сь.

18 И҆ речѐ ї҆ѹ́да: ѹ҆до́бь є҆́сть ѡ҆б̾ѧ́ти мно́гихъ рѹко́ю ма́лыхъ: и҆ нѣ́сть ра́знствїѧ пред̾ бг҃омъ нб҇нымъ сп҇тѝ во мно́гихъ и҆лѝ въ ма́лыхъ:

19 ѩ҆́кѡ не во мно́жествѣ во́євъ ѡ҆долѣ́нїе бра́ни є҆́сть, то́кмѡ ѿ нб҃сѐ крѣ́пость:

20 сі́и грѧдѹ́тъ къ на́мъ во мно́жествѣ ѹ҆кори́зны и҆ беззако́нїѧ, є҆́же и҆сто́ргнѹти на́съ и҆ жєны̀ на́шѧ и҆ ча҄да на҄ша, є҆́же взѧ́ти коры҄сти на́шѧ,

21 мы́ же ѡ҆полча́емсѧ за дѹ́шы на́шѧ и҆ зако́ны на́шѧ:

22 и҆ са́мъ гд҇ь сокрѹши́тъ и҆̀хъ пред̾ лице́мъ на́шимъ, вы́ же не ѹ҆страши́тесѧ и҆́хъ.

23 ѩ҆́коже преста̀ глаго́лати, и҆ наскочѝ на ни́хъ внеза́пѹ, и҆ сотре́сѧ сирѡ́нъ и҆ вѡ́и є҆гѡ̀ пред̾ ни́мъ:

24 и҆ погна̀ є҆го̀ въ низхожде́нїе веѳѡрѡ́на да́же до по́лѧ: и҆ падо́ша ѿ ни́хъ ѩ҆́кѡ ѻ҆́смь сѡ́тъ мѹже́й, про́чїи же побѣго́ша въ зе́млю фѷлїсті́млю.

25 И҆ нападѐ стра́хъ ї҆ѹ́динъ и҆ бра́тїи є҆гѡ̀ и҆ боѧ́знь на всѧ҄ ѩ҆зы́ки, ѩ҆̀же ѡ҆́крестъ и҆́хъ.

26 И҆ до́йде до царѧ̀ и҆́мѧ є҆гѡ̀, и҆ ѡ҆ ѡ҆полче́нїихъ ї҆ѹ́диныхъ повѣ́дахѹ всѝ ѩ҆зы́цы.

27 Е҆гда́ же ѹ҆слы́ша ца́рь а҆нтїо́хъ словеса̀ сїѧ҄, разгнѣ́васѧ ѩ҆́ростїю, и҆ посла́въ собра̀ си҄лы всѧ҄ ца́рства своегѡ̀, по́лкъ крѣ́покъ ѕѣлѡ̀:

28 и҆ ѿве́рзе сокро́вище своѐ, и҆ дадѐ ѡ҆бро́ки во́инѡмъ свои҄мъ на лѣ́то, и҆ заповѣ́да и҆̀мъ въ лѣ́то бы́ти готѡ́вымъ на всѧ́кѹ потре́бѹ.

29 И҆ ви́дѣ, ѩ҆́кѡ ѡ҆скѹдѣ̀ сребро̀ ѿ сокро́вищъ, и҆ да҄ни ѿ стра́нъ ма҄лы, ра́ди несогла́сїѧ и҆ ѩ҆́звы, ѩ҆̀же сотворѝ на землѝ, да во́зметъ закѡ́ннаѧ, ѩ҆̀же бѧ́хѹ ѿ пе́рвыхъ дні́й.

30 И҆ ѹ҆страши́сѧ, да не вознеимѣ́етъ є҆ди́ною и҆ два́жды въ росхо́ды и҆ даѧ҄нїѧ, ѩ҆̀же даѧ́ше пре́жде простра́нною рѹко́ю, и҆ и҆збы́точествова па́че царе́й бы́вшихъ пре́жде.

31 И҆ смѧте́сѧ дѹше́ю свое́ю ѕѣлѡ̀, и҆ ѹ҆мы́сли и҆тѝ въ персі́дѹ и҆ прїѧ́ти да҄ни ѿ стра́нъ и҆ собра́ти сребра̀ мно́гѡ.

32 И҆ ѡ҆ста́ви лѷсі́ю человѣ́ка сла́вна и҆ ѿ ро́да ца́рска над̾ вещьмѝ ца́рскими, ѿ рѣкѝ є҆ѵфра́та да́же до предѣ҄лъ є҆гѵ́петскихъ:

33 и҆ пита́ти а҆нтїо́ха сы́на своего̀, до́ндеже возврати́тсѧ са́мъ.

34 И҆ предадѐ є҆мѹ̀ по́лъ си́лы и҆ слонѡ́въ и҆ заповѣ́да є҆мѹ̀ ѡ҆ всѣ́хъ, и҆́хже совѣща̀, и҆ ѡ҆ ѡ҆бита́ющихъ во ї҆ѹде́и и҆ ї҆ер҇ли́мѣ,

35 посла́ти на ни́хъ си́лѹ, є҆́же сокрѹши́ти и҆ и҆сто́ргнѹти крѣ́пость ї҆и҃левѹ и҆ ѡ҆ста́нокъ ї҆ер҇ли́ма, и҆ ѿѧ́ти па́мѧть и҆́хъ ѿ мѣ́ста,

36 и҆ всели́ти сынѡ́въ и҆норо́дныхъ во всѣ́хъ предѣ́лѣхъ и҆́хъ, и҆ по жре́бїю раздѣли́ти зе́млю и҆́хъ.

37 И҆ ца́рь взѧ̀ по́лъ си́лы ѡ҆ста́вшихъ и҆ и҆зы́де ѿ а҆нтїохі́и ѿ гра́да ца́рства своегѡ̀, лѣ́та сто̀ четы́редесѧть седма́гѡ: и҆ пре́йде є҆ѵфра́тъ рѣкѹ̀ и҆ прохожда́ше въ вы҄шнїѧ страны҄.

38 И҆ и҆збра̀ лѷсі́а птоломе́а сы́на дорѷме́нова, и҆ нїкано́ра, и҆ горгі́ю мѹ́жы си҄льныѧ ѿ дрѹгѡ́въ царе́выхъ.

39 И҆ посла̀ съ ни́ми четы́редесѧть ты́сѧщъ мѹже́й и҆ се́дмь ты́сѧщъ ко́нникѡвъ, є҆́же и҆тѝ въ зе́млю ї҆ѹ́динѹ и҆ растли́ти ю҆̀ по словесѝ ца́рскѹ.

40 И҆ ѿидо́ша со все́ю си́лою свое́ю, и҆ прїидо́ша, и҆ ѡ҆полчи́шасѧ бли́з̾ а҆ммаѹ́ма на землѝ полево́й.

41 И҆ слы́шаша кѹпцы̀ страны̀ тоѧ̀ и҆́мѧ и҆́хъ, и҆ взѧ́ша сребро̀ и҆ зла́то мно́го ѕѣлѡ̀ и҆ ѻ҆́троки: и҆ прїидо́ша въ станы̀, да во́змѹтъ сынѡ́въ ї҆и҃левыхъ въ рабы҄, и҆ приложи́шасѧ къ ни҄мъ вѡ́и сѵ́рскїѧ и҆ землѝ и҆ноплеме́нникѡвъ.

42 И҆ ви́дѣ ї҆ѹ́да и҆ бра́тїѧ є҆гѡ̀, ѩ҆́кѡ ѹ҆мно́жишасѧ ѕла҄ѧ, и҆ вѡ́и ѡ҆полча́хѹсѧ въ предѣ́лѣхъ и҆́хъ: и҆ позна́ша словеса̀ царє́ва, ѩ҆̀же повелѣ̀ лю́демъ сотвори́ти въ погѹбле́нїе и҆ сконча́нїе.

43 И҆ речѐ кі́йждо ко и҆́скреннемѹ своемѹ̀: воста́немъ за и҆стребле́нїе люді́й на́шихъ и҆ ѡ҆полчи́мсѧ за лю́ди на́шѧ и҆ ст҃ы҄ѧ.

44 И҆ собра́сѧ со́нмъ є҆́же бы́ти готѡ́вымъ на бра́нь и҆ є҆́же моли́тисѧ и҆ проси́ти ми́лости и҆ щедро́тъ.

45 И҆ ї҆ер҇ли́мъ бѣ̀ неѡбита́емь а҆́ки пѹсты́нѧ: не бѣ̀ входѧ́й и҆ и҆сходѧ́й ѿ порожде́нїй є҆гѡ̀, и҆ ст҃ы́нѧ попра́на, и҆ сы́нове и҆норо́дныхъ въ краегра́дїи, бы́сть ѡ҆бита́лище ѩ҆зы́кѡмъ: и҆ взѧ́сѧ весе́лїе ѿ ї҆а́кѡва, и҆ ѡ҆скѹдѣ̀ (тѹ̀) сопѣ́ль и҆ гѹ́сли.

46 И҆ собра́шасѧ и҆ прїидо́ша въ массифѹ̀ прѧ́мѡ ї҆ер҇ли́мѹ, поне́же мѣ́сто моли́твы въ массифѣ̀ пе́рвѣе ї҆и҃лю.

47 И҆ пости́шасѧ тогѡ̀ днѐ, и҆ ѡ҆блеко́шасѧ во врє́тища, и҆ пе́пелъ посы́паша на главы҄ своѧ҄, и҆ растерза́ша ѡ҆дѣѧ҄нїѧ своѧ҄,

48 и҆ распростро́ша кни́гѹ зако́на, ѡ҆ ни́хже и҆спыта́хѹ ѩ҆зы́цы написа́ти на ни́хъ подѡ́бїѧ їдѡлъ свои́хъ,

49 и҆ принесо́ша ри҄зы свѧти́тєлскїѧ и҆ перворѡ́днаѧ и҆ десѧти҄ны: и҆ воздви́гнѹша назїре́євъ, и҆̀же напо́лниша дни҄,

50 и҆ возопи́ша гла́сомъ (ве́лїимъ) на нб҃о, рекѹ́ще: что̀ сотвори́мъ си҄мъ и҆ ка́мѡ и҆̀хъ ѿведе́мъ;

51 и҆ ст҃а҄ѧ твоѧ҄ попра́шасѧ и҆ ѡ҆скверни́шасѧ, и҆ свѧще́нницы твоѝ въ ско́рби и҆ въ смире́нїи:

52 и҆ сѐ, ѩ҆зы́цы собра́шасѧ на ны̀, да расто́ргнѹтъ на́съ: ты̀ вѣ́си, ѩ҆̀же помышлѧ́ютъ на на́съ:

53 ка́кѡ возмо́жемъ ста́ти пред̾ лице́мъ и҆́хъ, а҆́ще не ты̀ помо́жеши на́мъ;

54 И҆ вострѹби́ша трѹба́ми и҆ возопи́ша гла́сомъ ве́лїимъ.

55 И҆ посе́мъ поста́ви ї҆ѹ́да воевѡ́ды люді́й, ты́сѧщники и҆ со́тники, и҆ пѧтьдесѧ́тники и҆ десѧтонача́лники.

56 И҆ реко́ша созида́ющымъ до́мы и҆ ѡ҆брѹча́ющымъ жєны̀, и҆ насажда́ющымъ вїногра́ды и҆ боѧзли҄вымъ возврати́тисѧ комѹ́ждо въ до́мъ сво́й по зако́нѹ.

57 И҆ воздви́жесѧ по́лкъ и҆ ѡ҆полчи́сѧ на ю҆́гъ а҆ммаѹ́ма.

58 И҆ речѐ ї҆ѹ́да: препоѧ́шитесѧ, и҆ бѹ́дите въ сы́ны си҄льны, и҆ бѹ́дите гото́ви въ заѹ́трїе ѡ҆полчи́тисѧ на ѩ҆зы́ки сїѧ҄, и҆̀же собра́шасѧ на ны̀ растерза́ти на́съ и҆ ст҃а҄ѧ на҄ша:

59 ѩ҆́кѡ лѹ́чше є҆́сть на́мъ ѹ҆мре́ти въ бра́ни, не́же ви́дѣти ѕла҄ѧ люді́й на́шихъ и҆ ст҃ы́хъ:

60 и҆ ѩ҆́коже во́лѧ бѹ́детъ на нб҃сѝ, та́кѡ сотвори́тъ.

<< ← Prev Top Next → >>