Holy Bible project logo icon
FREE OFF-line Bible for Android Get Bible on Google Play QR Code Android Bible
Holy Bible
for Android

is a powerful Bible Reader which has possibility to download different versions of Bible to your Android device.

Bible Verses
for Android

Bible verses includes the best bible quotes in more than 35 languages

Pear Bible KJV
for Android

is an amazing mobile version of King James Bible that will help you to read this excellent book in any place you want.

Pear Bible BBE
for Android

is an amazing mobile version of Bible in Basic English that will help you to read this excellent book in any place you want.

Pear Bible ASV
for Android

is an amazing mobile version of American Standard Version Bible that will help you to read this excellent book in any place you want.

BIBLE VERSIONS / Библия / Новый Завет / а҃ маккавей́скаѧ

Библия - Церковнославянская

А҆пока́лѷѱїсъ а҃ маккавей́скаѧ в҃ маккавей́скаѧ

Глава 1 2 3 4 5 6 7 8 9 10 11 12 13 14 15 16

1 И҆ ца́рь а҆нтїо́хъ прохожда́ше вы҄шнїѧ страны҄ и҆ слы́ша, ѩ҆́кѡ є҆́сть є҆лѷмаі́съ въ персі́дѣ гра́дъ сла́венъ бога́тствомъ, сребро́мъ и҆ зла́томъ,

2 и҆ хра́мъ въ не́мъ бога́тъ ѕѣлѡ̀, и҆ тѹ̀ запѡ́ны зла҄ты, и҆ брѡнѧ̀ и҆ ѻ҆рѹ҄жїѧ, ѩ҆̀же ѡ҆ста́ви тѹ̀ а҆леѯа́ндръ сы́нъ фїлі́пповъ, ца́рь македѡ́нскїй, и҆́же ца́рствова пе́рвый во є҆́ллинѣхъ.

3 И҆ прїи́де и҆ и҆ска́ше взѧ́ти гра́дъ и҆ плѣни́ти є҆го̀, и҆ не возмо́же, ѩ҆́кѡ позна́сѧ сло́во сѹ́щымъ во гра́дѣ.

4 И҆ воста́ша проти́вѹ є҆мѹ̀ на бра́нь, и҆ побѣжѐ ѿтѹ́дѹ, и҆ и҆́де со ско́рбїю ве́лїею, и҆ возврати́сѧ въ вавѷлѡ́нъ.

5 И҆ прїи́де возвѣща́ѧй є҆мѹ̀ нѣ́кто въ персі́дѹ, ѩ҆́кѡ ѿбѣго́ша полцы̀ ходи́вшїи во ї҆ѹде́ю.

6 И҆ ходѝ лѷсі́а съ си́лою крѣ́пкою въ пе́рвыхъ, и҆ прогна́нъ бы́сть ѿ лица̀ и҆́хъ, и҆ возмого́ша ѻ҆рѹ́жїѧми и҆ си́лами и҆ коры́стьми мно́гими, ѩ҆̀же взѧ́ша ѿ полкѡ́въ, и҆̀хже и҆зби́ша.

7 И҆ разори́ша ме́рзость, ю҆́же созда̀ на ѻ҆лтарѝ во ї҆ер҇ли́мѣ, и҆ ст҃ы́ню, ѩ҆́коже пре́жде ѡ҆крѹжи́ша стѣна́ми высо́кими, и҆ веѳсѹ́рѹ гра́дъ є҆гѡ̀.

8 И҆ бы́сть ѩ҆́кѡ ѹ҆слы́ша ца́рь словеса̀ сїѧ҄, ѹ҆страши́сѧ и҆ смѹти́сѧ ѕѣлѡ̀: и҆ падѐ на ло́же и҆ впадѐ въ недѹ́гъ ѿ печа́ли, поне́же не сбы́стсѧ є҆мѹ̀, ѩ҆́коже помышлѧ́ше.

9 И҆ бѣ̀ тѹ̀ дни҄ мнѡ́ги, поне́же ѡ҆бнови́сѧ на не́мъ печа́ль вели́ка, и҆ мнѧ́ше, ѩ҆́кѡ ѹ҆́мретъ.

10 И҆ созва̀ всѧ҄ дрѹ́ги своѧ҄ и҆ речѐ и҆̀мъ: ѿи́де со́нъ ѿ ѻ҆́чїю моє́ю, и҆ и҆спадо́хъ се́рдцемъ ѿ печа́ли,

11 и҆ рѣ́хъ въ се́рдцы мое́мъ: до коли́кїѧ ско́рби доидо́хъ и҆ волны̀ ве́лїѧ, въ не́йже нн҃ѣ є҆́смь; ѩ҆́кѡ бла́гъ и҆ люби́мь бы́хъ во вла́сти мое́й:

12 нн҃ѣ же помина́ю ѕла҄ѧ, ѩ҆̀же сотвори́хъ во ї҆ер҇ли́мѣ, и҆ взѧ́хъ всѧ҄ сосѹ́ды зла҄ты и҆ срє́брѧны въ не́мъ, и҆ посла́хъ и҆з̾ѧ́ти ѡ҆бита́ющихъ во ї҆ѹде́и вотщѐ:

13 позна́хъ ѹ҆̀бо, ѩ҆́кѡ си́хъ ра́ди ѡ҆брѣто́ша мѧ̀ ѕла҄ѧ сїѧ҄: и҆ сѐ, ги́бнѹ ско́рбїю ве́лїею въ землѝ чѹжде́й.

14 И҆ призва̀ фїлі́ппа є҆ди́наго ѿ дрѹгѡ́въ свои́хъ, и҆ поста́ви є҆го̀ над̾ всѣ́мъ ца́рствомъ свои́мъ,

15 и҆ дадѐ є҆мѹ̀ дїади́мѹ и҆ ри́зѹ свою̀ и҆ пе́рстень, є҆́же води́ти а҆нтїо́ха сы́на є҆гѡ̀ и҆ воспита́ти є҆го̀ є҆́же ца́рствовати.

16 И҆ ѹ҆́мре та́мѡ а҆нтїо́хъ ца́рь въ лѣ́то сто̀ четы́редесѧть девѧ́тое.

17 И҆ позна̀ лѷсі́а, ѩ҆́кѡ ѹ҆́мре ца́рь. и҆ поста́ви ца́рствовати а҆нтїо́ха сы́на є҆гѡ̀ вмѣ́стѡ є҆гѡ̀, є҆го́же воспита̀ ю҆́ношѹ, и҆ наречѐ и҆́мѧ є҆мѹ̀ є҆ѵпа́тѡръ.

18 И҆ сѹ́щїи во краегра́дїи заключи́ша ї҆и҃лѧ ѡ҆́крестъ ст҃ы́хъ и҆ и҆ска́хѹ и҆̀мъ ѕла҄ѧ всегда̀ и҆ ѹ҆твержде́нїе ѩ҆зы́кѡмъ.

19 И҆ ѹ҆мы́сли ї҆ѹ́да и҆згна́ти и҆̀хъ: и҆ созва̀ всѧ҄ лю́ди, да ѡ҆бстоѧ́тъ и҆̀хъ.

20 И҆ собра́шасѧ вкѹ́пѣ и҆ ѡ҆бсѣдо́ша и҆̀хъ въ лѣ́то сто̀ пѧтьдесѧ́тое, и҆ сотворѝ на ни́хъ стрѣлостоѧ́тєлницы и҆ миха҄ны.

21 И҆ и҆зыдо́ша ѿ ни́хъ и҆з̾ заключе́нїѧ, и҆ прилѣпи́шасѧ тѣ҄мъ нѣ́цыи нечести́вїи ѿ ї҆и҃лѧ,

22 и҆ и҆до́ша ко царю̀ и҆ рѣ́ша: доко́лѣ не сотвори́ши сѹда̀ и҆ ѿмсти́ши бра́тїю на́шѹ;

23 мы̀ благоволи́мъ слѹжи́ти ѻ҆тцѹ̀ твоемѹ̀ и҆ ходи́ти въ за́повѣдехъ є҆гѡ̀ и҆ послѣ́довати повелѣ́нїємъ є҆гѡ̀:

24 и҆ ѡ҆блеже́ни сѹ́ть во краегра́дїи сы́нове люді́й на́шихъ, сегѡ̀ ра́ди и҆ ѿчѹжда́ютсѧ ѿ на́съ: и҆ є҆ли́цы ѡ҆брѣта́хѹсѧ ѿ на́съ, погѹблѧ́хѹсѧ, и҆ наслѣ҄дїѧ на҄ша расхища́єма бѧ́хѹ:

25 и҆ не на на́съ то́кмѡ простро́ша рѹ́кѹ, но и҆ на всѧ҄ предѣ́лы на́шѧ:

26 и҆ сѐ, ѡ҆полчи́шасѧ дне́сь на краегра́дїе во ї҆ер҇ли́мѣ, є҆́же взѧ́ти є҆го̀ и҆ ст҃ы́ню, и҆ веѳсѹ́рѹ ѹ҆тверди́ша:

27 и҆ а҆́ще не предвари́ши и҆̀хъ скорѣ́е, бѡ́лшаѧ си́хъ сотворѧ́тъ, и҆ не возмо́жеши ѹ҆держа́ти и҆̀хъ.

28 И҆ прогнѣ́васѧ ца́рь, є҆гда̀ ѹ҆слы́ша, и҆ собра̀ всѧ҄ дрѹ́ги своѧ҄ и҆ нача́лники си́лы своеѧ̀ и҆ и҆̀же над̾ кѡ́нники:

29 и҆ ѿ ца́рствъ и҆ны́хъ и҆ ѿ ѻ҆стровѡ́въ морски́хъ прїидо́ша къ немѹ̀ си҄лы нає́мницы:

30 и҆ бы́сть число̀ си́лъ є҆гѡ̀ сто̀ ты́сѧщъ пѣшцє́въ и҆ два́десѧть ты́сѧщъ ко́нникѡвъ, и҆ слонѡ́въ три́десѧть два̀ вѣ́дѧщихъ бра́нь.

31 И҆ прїидо́ша сквозѣ̀ ї҆дѹме́ю и҆ ѡ҆полчи́шасѧ въ веѳсѹ́рѣ, и҆ ра́товахѹ дни҄ мнѡ́ги и҆ сотвори́ша миха҄ны: и҆ и҆зыдо́ша и҆ пожго́ша и҆̀хъ ѻ҆гне́мъ и҆ би́шасѧ мѹ́жественнѣ.

32 И҆ ѿи́де ї҆ѹ́да ѿ краегра́дїѧ и҆ ѡ҆полчи́сѧ въ веѳсаха́рїи проти́вѹ полка̀ царе́ва.

33 И҆ воста̀ ца́рь ѕѣлѡ̀ ра́нѡ и҆ воздви́же ѡ҆полче́нїе во ѹ҆стремле́нїи є҆гѡ̀ по пѹтѝ веѳсаха́рїи: и҆ ѹ҆стро́ишасѧ си҄лы на бра́нь, и҆ вострѹби́ша трѹба́ми,

34 и҆ слонѡ́мъ показа́ша кро́вь гро́здовѹ и҆ ѩ҆́гѡды, є҆́же поѡстри́ти и҆̀хъ на бра́нь:

35 и҆ разлѹчи́ша ѕвѣре́й на полкѝ и҆ приста́виша коемѹ́ждо слонѹ̀ ты́сѧщѹ мѹже́й ѡ҆блече́нныхъ въ брѡнѧ̀ желѣ́зомъ соплетє́ны, и҆ шле́мы мѣ́дѧни на глава́хъ и҆́хъ, и҆ пѧ́ть сѡ́тъ ко́нникѡвъ вчине́ныхъ коемѹ́ждо ѕвѣ́рю и҆збра́нныхъ.

36 Сїѧ҄ бѣ́ша пре́жде вре́мене, и҆дѣ́же а҆́ще бѣ̀ ѕвѣ́рь: и҆ и҆дѣ́же а҆́ще и҆дѧ́ше, и҆дѧ́хѹ вкѹ́пѣ и҆ не ѿстѹпа́хѹ ѿ негѡ̀.

37 И҆ пѵ́рги древѧ́ни на ни́хъ крѣ́пцы защища́ющїи на ко́емждо ѕвѣ́ри, препоѧ́сани на не́мъ миха́нами, и҆ на ко́емждо мѹже́й си́лы три́десѧть два̀ вою́ющихъ на ни́хъ, и҆ ї҆нді́анинъ ѹ҆прави́тель є҆гѡ̀.

38 И҆ про́чыѧ ко́нники сю́дѹ и҆ сю́дѹ поста́виша на двѣ̀ ча҄сти полка̀, побѹжда́юще и҆ загражда́юще въ де́брехъ.

39 Е҆гда́ же возсїѧ̀ со́лнце на щиты̀ златы҄ѧ и҆ мѣ҄дѧныѧ, ѡ҆бсїѧ́ша го́ры ѿ ни́хъ и҆ ѡ҆блиста́ша ѩ҆́кѡ лампа҄ды ѻ҆́гнєнныѧ.

40 И҆ ѿлѹчи́сѧ ча́сть нѣ́каѧ ѿ полка̀ царе́ва на го́ры высѡ́ки, и҆ нѣ́цыи на ни҄жшаѧ, и҆ и҆дѧ́хѹ крѣ́пцѣ и҆ чи́ннѡ.

41 И҆ поколеба́шасѧ всѝ слы́шащїи гла́съ мно́жества и҆́хъ, и҆ пѹтьше́ствїѧ мно́гихъ, и҆ сраже́нїѧ ѻ҆рѹ́жїй: бѣ́ бо ѡ҆полче́нїе вели́ко ѕѣлѡ̀ и҆ крѣ́пко.

42 И҆ прибли́жисѧ ї҆ѹ́да и҆ по́лкъ є҆гѡ̀ на бра́нь, и҆ падо́ша ѿ полка̀ царе́ва ше́сть сѡ́тъ мѹже́й.

43 И҆ ѹ҆ви́дѣ є҆леаза́ръ сы́нъ савара́нь є҆ди́наго ѿ ѕвѣре́й ѡ҆блече́на въ броню̀ ца́рскѹ, и҆ бѧ́ше вы́ше про́чїихъ ѕвѣре́й, и҆ возмнѣ́сѧ є҆мѹ̀, ѩ҆́кѡ на не́мъ є҆́сть ца́рь:

44 и҆ вдаде́сѧ са́мъ є҆́же и҆зба́вити лю́ди своѧ҄ и҆ сотвори́ти себѣ̀ и҆́мѧ вѣ́чное,

45 и҆ течѐ къ немѹ̀ съ де́рзостїю въ среди́нѹ полка̀, и҆ побива́ше ѡ҆деснѹ́ю и҆ ѡ҆шѹ́юю, и҆ раздѣлѧ́хѹсѧ ѿ негѡ̀ сю́дѹ и҆ сю́дѹ:

46 и҆ вни́де под̾ слона̀, и҆ подложи́сѧ є҆мѹ̀, и҆ ѹ҆бѝ є҆го̀, и҆ падѐ на зе́млю верхѹ̀ є҆гѡ̀, и҆ ѹ҆́мре тѹ̀.

47 И҆ ви́дѣша си́лѹ ца́рства и҆ ѹ҆стремле́нїе во́євъ, и҆ ѹ҆клони́шасѧ ѿ ни́хъ.

48 Сѹ́щїи же ѿ полка̀ царе́ва взыдо́ша проти́вѹ и҆́хъ на ї҆ер҇ли́мъ: и҆ ѡ҆полчи́сѧ ца́рь на ї҆ѹде́ю и҆ на го́рѹ сїѡ́нъ.

49 И҆ сотворѝ ми́ръ съ сѹ́щими въ веѳсѹ́рѣхъ: и҆ и҆зыдо́ша и҆з̾ гра́да, ѩ҆́кѡ не бѣ̀ и҆̀мъ та́мѡ пи́щи, є҆́же затвори́тисѧ въ не́мъ, поне́же сѹббѡ́та бѧ́ше землѝ.

50 И҆ взѧ̀ ца́рь веѳсѹ́рѹ и҆ поста́ви тѹ̀ стра́жѹ храни́ти ю҆̀.

51 И҆ ѡ҆полчи́сѧ на мѣ́сто ст҃ы́ни дни҄ мнѡ́ги, и҆ поста́ви тѹ̀ стрѣлостоѧ́тєлницы и҆ миха҄ны, и҆ ѻ҆гнемє́тницы и҆ каменомє́тницы и҆ скорпїѡ́ны, є҆́же бы мета́ти стрѣ́лы и҆ пра́щы.

52 Сотвори́ша же и҆ ті́и миха҄ны проти́вѹ миха́нъ и҆́хъ, и҆ бра́шасѧ дни҄ мнѡ́ги.

53 Пи́ща же не бѧ́ше во гра́дѣ, зане́же седмо́е лѣ́то бѣ̀, и҆ и҆збѣжа́вшїи во ї҆ѹде́ю ѿ ѩ҆зы҄къ поѧдо́ша ѡ҆ста́нокъ сокрове́нїѧ.

54 И҆ ѡ҆ста́шасѧ во свѧти́лищи мѹже́й ма́лѡ, ѩ҆́кѡ ѡ҆б̾ѧ́тъ и҆̀хъ гла́дъ, и҆ расточе́ни бы́ша кі́йждо въ мѣ́сто своѐ.

55 И҆ слы́ша лѷсі́а, ѩ҆́кѡ фїли́ппъ, є҆го́же поста́ви ца́рь а҆нтїо́хъ, є҆щѐ жи́въ сы́й, да воспита́етъ а҆нтїо́ха сы́на є҆гѡ̀, во є҆́же ца́рствовати є҆мѹ̀,

56 возврати́сѧ ѿ персі́ды и҆ миді́и, и҆ вѡ́и ца́рстїи ходи́вшїи съ ни́мъ, и҆ ѩ҆́кѡ и҆́щетъ прїѧ́ти ве́щы:

57 и҆ потща́сѧ поитѝ ѿ краегра́дїѧ и҆ глаго́лати ко царю̀ и҆ воево́дамъ си́лы и҆ къ мѹжє́мъ: ѡ҆скѹдѣва́емъ на всѧ́къ де́нь, и҆ пи́ща на́мъ ма́ла (є҆́сть), и҆ мѣ́сто, є҆́же ѡ҆бстои́мъ, ѹ҆твержде́но, и҆ надлежи́тъ на́мъ (стро́ити) ѩ҆̀же ѡ҆ ца́рствѣ:

58 нн҃ѣ ѹ҆̀бо дади́мъ десни́цѹ человѣ́кѡмъ тѣ҄мъ и҆ сотвори́мъ съ ни́ми ми́ръ и҆ со всѣ́ми людьмѝ и҆́хъ,

59 и҆ ѹ҆ста́вимъ и҆̀мъ, да хо́дѧтъ въ зако́нѣхъ свои́хъ, ѩ҆́коже пре́жде: ра́ди бо зако́нѡвъ свои́хъ, ѩ҆̀же разрѹши́хомъ, прогнѣ́вашасѧ и҆ сотвори́ша всѧ҄ сїѧ҄.

60 И҆ ѹ҆го́дно бы́сть сло́во пред̾ царе́мъ и҆ нача҄лники, и҆ посла̀ къ ни҄мъ ми́ръ сотвори́ти. и҆ прїѧ́ша.

61 И҆ клѧ́тсѧ и҆̀мъ ца́рь и҆ нача҄лницы: ѡ҆ си́хъ и҆зыдо́ша и҆з̾ тверды́ни.

62 И҆ вни́де ца́рь въ го́рѹ сїѡ́нъ и҆ ви́дѣ тверды́ню мѣ́ста: и҆ ѿве́ржесѧ клѧ́твы, є҆́юже клѧ́тсѧ, и҆ повелѣ̀ разори́ти стѣ́нѹ ѡ҆́крестъ.

63 И҆ ѿи́де тща́телнѡ и҆ возврати́сѧ во а҆нтїохі́ю, и҆ ѡ҆брѣ́те фїлі́ппа госпо́дствѹюща над̾ гра́домъ, и҆ воева̀ на́нь, и҆ взѧ̀ гра́дъ нѹ́ждею.

<< ← Prev Top Next → >>