Holy Bible project logo icon
FREE OFF-line Bible for Android Get Bible on Google Play QR Code Android Bible
Holy Bible
for Android

is a powerful Bible Reader which has possibility to download different versions of Bible to your Android device.

Bible Verses
for Android

Bible verses includes the best bible quotes in more than 35 languages

Pear Bible KJV
for Android

is an amazing mobile version of King James Bible that will help you to read this excellent book in any place you want.

Pear Bible BBE
for Android

is an amazing mobile version of Bible in Basic English that will help you to read this excellent book in any place you want.

Pear Bible ASV
for Android

is an amazing mobile version of American Standard Version Bible that will help you to read this excellent book in any place you want.

BIBLE VERSIONS / Библия / Новый Завет / в҃ маккавей́скаѧ

Библия - Церковнославянская

а҃ маккавей́скаѧ в҃ маккавей́скаѧ г҃ маккавей́скаѧ

Глава 1 2 3 4 5 6 7 8 9 10 11 12 13 14 15

1 Въ сїе́ же вре́мѧ вторы́й похо́дъ ѹ҆гото́ва а҆нтїо́хъ во є҆гѵ́петъ.

2 Слѹчи́сѧ же по всемѹ̀ гра́дѹ, є҆два̀ не чрез̾ четы́редесѧть дні́й ѩ҆влѧ́тисѧ на воздѹ́сѣ рнста́ющихъ ко́нникѡвъ златы҄ѧ ѻ҆дє́жды и҆мѹ́щихъ и҆ ко́пїѧми по полкѡ́мъ воѡрѹже́нныхъ,

3 и҆ собра҄нїѧ ко́ней чи́ннѡ ѹ҆стро́енныхъ, и҆схождє́нїѧ твѡри́маѧ и҆ сражє́нїѧ ѿ ѻ҆бои́хъ стра́нъ, и҆ щитѡ́въ движє́нїѧ и҆ сѹ́лицъ мно́жество, и́ мече́й и҆сторжє́нїѧ и҆ стрѣ́лъ мета҄нїѧ, и҆ златы́хъ ѻ҆де́ждъ блиста҄нїѧ и҆ всѧ҄кїѧ брѡнѝ.

4 Тѣ́мже всѝ молѧ́хѹсѧ, да ѩ҆вле́нїе во бла́го бѹ́детъ.

5 Бы́вши же вѣ́сти лжи́вѣй, а҆́кибы а҆нтїо́хъ ѿ житїѧ̀ ѿше́лъ, взе́мъ ї҆асѡ́нъ не ме́нши ты́ѧщи мѹже́й, внеза́пѹ на гра́дъ сотворѝ нападе́нїе гра́жданѡмъ же на стѣ́нѹ восте́кшымъ, и҆ наконе́цъ ѹ҆жѐ взе́млемѹ сѹ́щѹ гра́дѹ, менела́й во краегра́дїе ѹ҆бѣжѐ.

6 Ї҆асѡ́нъ же творѧ́ше закла҄нїѧ гра́жданъ свои́хъ неща́днѡ, не помышлѧ́ѧ, ѩ҆́кѡ благовре́менство, є҆́же на ѹ҆́жики, ѕлополѹ́чїе є҆́сть преве́лїе: мнѧ̀ над̾ врага́ми, а҆ не над̾ є҆диноѧзы́чными побѣди́тєлнаѧ прїѧ́ти,

7 нача́лства ѹ҆́бѡ не ѡ҆держа̀, кончи́нѹ же навѣ́та стѹ́дъ прїе́мь, бѣгле́цъ па́ки во а҆мані́тїдѹ ѿи́де.

8 Коне́цъ ѹ҆̀бо ѕла́гѡ житїѧ̀ полѹчѝ, заключе́нъ ѹ҆ а҆ре́ты а҆ра́вскагѡ мѹчи́телѧ, бѣ́гаѧ ѿ гра́да во гра́дъ, гони́мь ѿ всѣ́хъ и҆ ненави́димь а҆́ки зако́нѡвъ ѿстѹ́пникъ, и҆ ѡ҆гнѹша́емь, ѩ҆́кѡ ѻ҆те́чествѹ и҆ гра́жданѡмъ вра́гъ, во є҆гѵ́петъ и҆згна́нъ бы́сть.

9 И҆ и҆́же мно́гихъ ѿ ѻ҆те́чества и҆згна́вый, стра́нствѹѧ поги́бе къ лакедемо́нѧнѡмъ ѿше́дъ, а҆́ки сро́дства ра́ди прибѣ́жище хотѧ́щь и҆мѣ́ти.

10 И҆ и҆́же мно́жество непогребе́нныхъ и҆зве́рже, (са́мъ) не ѡ҆пла́канъ бы́сть, и҆ погребе́нїѧ ни какова̀ сподо́бисѧ, нижѐ ѻ҆те́ческомѹ гро́бѹ приѡбщи́сѧ.

11 Возвѣсти́вшымъ же царю̀ ѡ҆ бы́вшихъ, ѹ҆сѹмнѣ́сѧ (ца́рь), да не ѿстѹ́питъ ї҆ѹде́а: и҆ тогѡ̀ ра́ди прише́дъ и҆з̾ є҆гѵ́пта раз̾ѧре́нъ дѹше́ю, взѧ̀ гра́дъ ѻ҆рѹ́жїемъ

12 и҆ повелѣ̀ во́инѡмъ сѣщѝ неща́днѡ срѣта́ющихсѧ и҆ въ до́мы входѧ́щихъ закала́ти.

13 Бы́ша же ѹ҆бїє́нїѧ ю҆́ношъ и҆ ста́рцєвъ, мѹже́й и҆ же́нъ и҆ ча҄дъ и҆стреблє́нїѧ, дѣ́въ же и҆ ѻ҆трокѡ́въ закла́нїѧ.

14 Ѻ҆́смьдесѧтъ же ты́сѧщъ во всѣ́хъ трїе́хъ дне́хъ и҆збїе́ни: и҆ четы́редесѧть ѹ҆́бѡ ты́сѧщъ плѣне́ни, не ме́нши же ѹ҆бїе́ныхъ про́дани бы́ша.

15 Не дово́ленъ же бы́въ и҆ си́ми, дерзнѹ̀ вни́ти въ це́рковь всеѧ̀ землѝ свѧтѣ́йшѹю, и҆мѣ́ѧй менела́а предводи́телѧ, бы́вша зако́нѡвъ и҆ ѻ҆те́чества преда́телѧ.

16 И҆ скве́рныма рѹка́ма взе́млѧ свѧщє́нныѧ сосѹ́ды и҆ ѩ҆̀же ѿ и҆ны́хъ царе́й положє́ннаѧ на ѹ҆множе́нїе и҆ сла́вѹ мѣ́ста и҆ че́сть, скве́рныма рѹка́ма прикаса́ѧсѧ подаѧ́ше.

17 И҆ вознесе́сѧ мы́слїю а҆нтїо́хъ, не помышлѧ́ѧ, ѩ҆́кѡ грѣ҄хъ ра́ди ѡ҆бита́ющихъ во гра́дѣ ма́лѡ прогнѣ́васѧ влдка, тогѡ̀ ра́ди бы́сть ѡ҆ мѣ́стѣ презрѣ́нїе:

18 а҆́ще же бы не слѹчи́лосѧ и҆̀мъ мно́гими грѣхи҄ бы́ти ѡ҆б̾ѧ҄тымъ, ѩ҆́коже бѣ̀ и҆лїодѡ́ръ по́сланный ѿ селе́ѵка царѧ̀ ко ѡ҆смотре́нїю сокро́вищнагѡ храни́лища, се́й прише́дъ внеза́пѹ бїе́нъ бы́въ ѿврати́лсѧ бы ѿ де́рзости.

19 Но не ра́ди мѣ́ста ѩ҆зы́къ, но ѩ҆зы́ка ра́ди мѣ́сто гд҇ь и҆збра̀.

20 Тѣ́мже ѹ҆̀бо и҆ сїѐ мѣ́сто соприча́стно бы́сть людски́хъ ѕѡ́лъ слѹчи́вишихсѧ, послѣди́ же благодѣѧ́нїємъ ѿ гд҇а приѡбщи́сѧ, и҆ ѡ҆ста́вленое во гнѣ́вѣ вседержи́телѧ, па́ки въ примире́нїи вели́кагѡ влдки со всѧ́кою сла́вою и҆спра́висѧ.

21 ?И҆́бо а҆нтїо́хъ и҆з̾ це́ркве взе́мъ ты́сѧщѹ ѻ҆́смь сѡ́тъ тала́нтѡвъ, ско́рѡ во а҆нтїохі́ю возврати́сѧ, ча́ѧ ѿ горды́ни зе́млю ѹ҆́бѡ пла́вателнѹ, а҆ мо́ре пѣшехо́дно положи́ти ѿ возвыше́нїѧ се́рдца.

22 Ѡ҆ста́ви же и҆ приста́вники ко ѡ҆ѕлобле́нїю люді́й, во ї҆ер҇ли́мѣ ѹ҆́бѡ фїлі́ппа ро́домъ фрѷге́анина, нра́въ жесточа́йшїй и҆мѹ́щаго не́же поста́вльшїй (є҆го̀),

23 въ гарїзі́нѣ же а҆ндроні́ка: и҆ къ си҄мъ менела́а, и҆́же ѕлѣ́е и҆ны́хъ ѡ҆ѕлоблѧ́ше гра́жданъ,

24 ненави́стное же ко гражда́нѡмъ ї҆ѹдє́йскимъ и҆мѣ́ѧй се́рдце, посла̀ ненави́стнаго нача́лника а҆поллѡ́нїа со два́десѧтїю двѣма̀ ты́сѧщьми во́инства, повелѣ́въ є҆мѹ̀ всѣ́хъ въ во́зрастѣ сѹ́щихъ погѹби́ти, жєны́ же и҆ ю҆́ношы продаѧ́ти.

25 Се́й же прише́дъ во ї҆ер҇ли́мъ и҆ а҆́ки ми́ръ себѣ̀ притвори́въ, ѹ҆держа́сѧ да́же до днѐ свѧтыѧ сѹббѡ́ты: и҆ ѹ҆лѹчи́въ празднѹющихъ ї҆ѹде́ѡвъ, воѡрѹжи́тисѧ свои҄мъ повелѣ̀,

26 и҆ и҆зше́дшихъ всѣ́хъ на позо́ръ закла̀, и҆ во гра́дъ со ѻ҆рѹ́жїи вскочи́въ, люді́й мно́гое мно́жество погѹбѝ.

27 Ї҆ѹ́да же маккаве́й, и҆́же десѧ́тый бы́въ, и҆ ѿше́дъ въ пѹ́сто мѣ́сто, ѕвѣри́нымъ ѡ҆́бразомъ въ гора́хъ живѧ́ше съ сѹ́щими съ ни́мъ, и҆ травнѹ́ю пи́щѹ ѩ҆дѹ́ще пребыва́хѹ, є҆́же бы не причасти́сѧ ѡ҆скверне́нїю.

<< ← Prev Top Next → >>