Holy Bible project logo icon
FREE OFF-line Bible for Android Get Bible on Google Play QR Code Android Bible
Holy Bible
for Android

is a powerful Bible Reader which has possibility to download different versions of Bible to your Android device.

Bible Verses
for Android

Bible verses includes the best bible quotes in more than 35 languages

Pear Bible KJV
for Android

is an amazing mobile version of King James Bible that will help you to read this excellent book in any place you want.

Pear Bible BBE
for Android

is an amazing mobile version of Bible in Basic English that will help you to read this excellent book in any place you want.

Pear Bible ASV
for Android

is an amazing mobile version of American Standard Version Bible that will help you to read this excellent book in any place you want.

BIBLE VERSIONS / Библия / Новый Завет / г҃ е҆́здры

Библия - Церковнославянская

в҃ е҆́здры г҃ е҆́здры Посла́нїе їеремі́ино

Глава 1 2 3 4 5 6 7 8 9 10 11 12 13 14 15 16

1 И҆ ѿвѣща ко̀ мнѣ̀ и҆ речѐ: мѣ́рѧщь мѣ́ри вре́мѧ въ себѣ̀ самѣ́мъ: и҆ бѹ́детъ, повнегда̀ ѹ҆ви́диши, є҆гда̀ пре́йдетъ ча́сть нѣ́котораѧ зна́менїй, ѩ҆̀же предрѣчє́на сѹ́ть,

2 тогда̀ ѹ҆разѹмѣ́еши, ѩ҆́кѡ то̀ са́мое є҆́сть вре́мѧ, въ не́же начне́тъ вы́шнїй посѣща́ти вѣ́къ, и҆́же ѿ негѡ̀ сотворе́нъ бы́сть:

3 и҆́ є҆гда̀ ѹ҆́зритсѧ въ вѣ́цѣ зыба́нїе мѣ́стъ и҆ люді́й смѹще́нїе,

4 тогда̀ ѹ҆разѹмѣ́еши, ѩ҆́кѡ ѡ҆ си́хъ гл҃аше вы́шнїй ѿ дні́й, и҆̀же бы́ша пред̾ тобо́ю ѿ нача́ла:

5 ѩ҆́коже бо всѐ, є҆́же сотворе́но є҆́сть въ вѣ́цѣ, нача́ло и҆́мать, та́кѡ и҆ сконча́нїе, и҆ сконча́нїе є҆́сть ѩ҆вле́но:

6 та́кѡ и҆ вы́шнѧгѡ времена̀ нача҄ла и҆мѣ́ютъ ѩ҆влє́нна въ чѹдесѣ́хъ и҆ си́лахъ, и҆ сконча҄нїѧ въ дѣѧ́нїи и҆ зна́менїихъ:

7 и҆ бѹ́детъ, всѧ́къ и҆́же спасе́тсѧ и҆ и҆́же возмо́жетъ и҆збѣжа́ти дѣла́ми свои́ми и҆ вѣ́рою, є҆́юже вѣ́ровасте,

8 ѡ҆ста́нетсѧ ѿ предрѣче́нныхъ бѣ́дъ и҆ ѹ҆́зритъ сп҇нїе моѐ на землѝ мое́й и҆ въ предѣ́лѣхъ мои́хъ, ѩ҆́кѡ ѡ҆ст҃и́хъ менѐ ѿ вѣ́ка:

9 и҆ тогда̀ ѹ҆милѧ́тсѧ, и҆̀же нн҃ѣ ѿстѹпи́ша ѿ пѹті́й мои́хъ, и҆ въ мѹче́нїихъ пребѹ́дѹтъ ті́и, и҆̀же ѿверго́ша ѧ҆̀ въ презо́рствѣ:

10 и҆̀же бо не позна́ша мѧ̀, живѹ́ще благодѣѧ҄нїѧ полѹчи́вше,

11 и҆ и҆̀же возненави́дѣша зако́нъ мо́й, є҆гда̀ є҆щѐ бѧ́хѹ и҆мѣ́юще свобо́дѹ и҆ є҆гда̀ є҆щѐ бѧ́ше и҆̀мъ ѿве́рсто покаѧ́нїѧ мѣ́сто, не ѹ҆разѹмѣ́ша, но ѹ҆ничижи́ша,

12 си҄мъ подоба́етъ по сме́рти въ мѹче́нїи позна́ти:

13 ты̀ ѹ҆̀бо ктомѹ̀ не бѹ́ди любопы́тливъ, ка́кѡ нечести́вїи мѹ́читисѧ бѹ́дѹтъ, но и҆спытѹ́й, ка́кѡ пра́веднїи спасѹ́тсѧ, и҆ и҆́хже вѣ́къ, и҆ ра́ди кото́рыхъ вѣ́къ, и҆ когда̀.

14 И҆ ѿвѣща́хъ и҆ реко́хъ:

15 дре́вле глаго́лахъ и҆ нн҃ѣ глаго́лю и҆ по́слѣ возглаго́лю, ѩ҆́кѡ мно́жае сѹ́ть, и҆̀же поги́бнѹтъ, не́жели и҆̀же спасѹ́тсѧ, ѩ҆́коже ѹ҆множа́ютсѧ вѡ́лны над̾ ка́плю.

16 И҆ ѿвѣща̀ ко мнѣ̀ и҆ речѐ:

17 какова̀ ни́ва, такѡва̀ и҆ сѣ́мена, и҆ какѡвы̀ цвѣ́ти, такѡвы̀ и҆ пестрѡты̀, и҆ како́въ дѣ́латель, таково̀ и҆ дѣ́ло, како́въ земледѣ́лецъ, таково̀ и҆ земледѣ́лство, поне́же вре́мѧ бѧ́ше вѣ́ка:

18 и҆ нн҃ѣ є҆гда̀ бы́хъ ѹ҆готовлѧ́ющь тѣ҄мъ, и҆̀же нн҃ѣ сѹ́ть, пре́жде не́же бы́сть вѣ́къ, въ не́мже бы ѡ҆бита́ли: и҆ никто́же проти́вѹ речѐ мнѣ̀:

19 тогда́ бо всѧ́къ, и҆ нн҃ѣ творе́цъ въ мі́рѣ се́мъ ѹ҆гото́ваннѣмъ, и҆ въ жа́твѣ неѡскѹдѣва́ющей, и҆ въ зако́нѣ неизслѣ́димѣмъ растлѣ́ни сѹ́ть нра҄вы свои́ми:

20 и҆ разсмотри́хъ вѣ́къ, и҆ сѐ, бѧ́ше бѣда̀ ра́ди помышле́нїй, ѩ҆̀же въ не́мъ прїидо́ша:

21 и҆ ви́дѣхъ, и҆ прости́хъ є҆мѹ̀ ѕѣлѡ̀, и҆ сохрани́хъ мнѣ̀ ѩ҆́годѹ ѿ гро́зда и҆ сажде́нїе ѿ колѣ́на мно́га:

22 да поги́бнетъ ѹ҆̀бо мно́жество, є҆́же без̾ вины̀ рожде́но є҆́сть, и҆ да сохрани́тсѧ ѩ҆́годица моѧ̀ и҆ насажде́нїе моѐ, є҆́же вели́кимъ трѹдо́мъ соверши́хъ:

23 ты́ же, а҆́ще и҆ є҆щѐ спѹ́стиши се́дмь дні́й и҆нѣ́хъ, но да не пости́шисѧ въ ни́хъ,

24 по́йдеши на по́ле цвѣ́тное, и҆дѣ́же до́мъ нѣ́сть созда́нъ, и҆ снѣ́си то́кмѡ ѿ цвѣтѡ́въ полевы́хъ, и҆ мѧ́са да не вкѹ́сиши, и҆ вїна̀ не пїе́ши, но то́кмѡ цвѣ́ты:

25 моли́сѧ вы́шнемѹ непреста́ннѡ, и҆ прїидѹ̀ и҆ возгл҃ю съ тобо́ю.

26 И҆ и҆до́хъ, ѩ҆́коже речѐ мнѣ̀, на по́ле, є҆́же зове́тсѧ а҆рда́ѳъ, и҆ сѣдо́хъ та́мѡ въ цвѣ́тѣхъ, и҆ ѿ тра́въ се́лныхъ ѩ҆до́хъ, и҆ бы́сть мѝ пи́ща и҆́хъ въ сы́тость.

27 И҆ бы́сть по седми́хъ дне́хъ, и҆ а҆́зъ лежа́хъ на сѣ́нѣ, и҆ се́рдце моѐ па́ки смѹща́шесѧ, ѩ҆́коже пре́жде.

28 И҆ ѿверзо́шасѧ ѹ҆ста̀ моѧ҄, и҆ нача́хъ глаго́лати пред̾ вы́шнимъ и҆ реко́хъ:

29 ѽ, гд҇и! тѧ̀ на́мъ показѹ́ѧй показа́лсѧ є҆сѝ ѻ҆тцє́мъ на́шымъ въ пѹсты́ни непрохо́днѣй и҆ непло́днѣй, є҆гда̀ бѧ́хѹ и҆сходѧ́ще ѿ є҆гѵ́пта,

30 и҆ гл҃ющь ре́клъ є҆сѝ: ты̀, ї҆и҃лю, послѹ́шай мѧ̀, и҆ сѣ́мѧ ї҆а́кѡвле, вонмѝ словесє́мъ мои҄мъ:

31 се́ бо, а҆́зъ сѣ́ю зако́нъ мо́й, и҆ сотвори́тъ въ ва́съ пло́дъ, и҆ просла́витесѧ въ не́мъ во вѣ́къ:

32 и҆́бо ѻ҆тцы̀ ва́ши прїе́млюще зако́нъ не сохрани́ша и҆ закѡ́ннаѧ моѧ҄ не соблюдо́ша, и҆ бы́сть пло́дъ зако́на неродѧ́щь: ниже́ бо можа́ше, поне́же тво́й бѣ̀:

33 занѐ, и҆̀же прїѧ́ша, погибо́ша не сохранѧ́юще, є҆́же въ ни́хъ сѣ́ѧно бы́сть:

34 и҆ сѐ, ѡ҆бы́чай є҆́сть, да є҆гда̀ прїи́метъ землѧ̀ сѣ́мѧ, и҆лѝ кора́бль мо́ре, и҆лѝ сосѹ́дъ нѣ́кїй пи́щѹ и҆лѝ питїѐ: є҆гда̀ бѹ́детъ поврежде́но то̀, въ не́мже сѣ́ѧно є҆́сть, и҆лѝ то̀, въ не́мже поста́влено є҆́сть,

35 кѹ́пнѡ и҆ то̀, є҆́же насѣ́ѧно и҆лѝ поста́влено є҆́сть, и҆лѝ ѩ҆̀же прїѧ҄та сѹ́ть, и҆стреблѧ́ютсѧ, и҆ воспрїѧ҄таѧ ѹ҆жѐ не пребыва́ютъ пред̾ на́ми: на́мъ же не та́кѡ сотворе́но бы́сть:

36 мы́ бо, и҆̀же зако́нъ прїѧ́ли є҆смы̀, согрѣша́юще погибо́хомъ, и҆ се́рдце на́ше, є҆́же воспрїѧ̀ є҆го̀:

37 ѩ҆́кѡ зако́нъ не поги́бе, но пребыва́етъ во свое́мъ трѹдѣ̀.

38 И҆ є҆гда̀ глаго́лахъ сїѧ҄ въ се́рдцы мое́мъ, воззрѣ́хъ ѻ҆чи́ма мои́ма и҆ ви́дѣхъ женѹ̀ въ деснѣ́й странѣ̀, и҆ сѐ, сїѧ̀ рыда́ше и҆ пла́каше со гла́сомъ вели́кимъ и҆ дѹше́ю болѧ́ше ѕѣлѡ̀, и҆ ѡ҆дѣѧ́нїе є҆ѧ̀ раздра́но, и҆ пе́пелъ на главѣ̀ є҆ѧ̀.

39 И҆ ѡ҆ста́вихъ помышлє́нїѧ, въ кото́рыхъ бы́хъ мы́слѧ, и҆ ѡ҆брати́хсѧ къ не́й

40 и҆ реко́хъ є҆́й: ѡ҆ че́мъ пла́чеши, и҆ что̀ боли́ши дѹше́ю;

41 И҆ речѐ ко мнѣ̀: ѡ҆ста́ви мѧ̀, го́споди мо́й, да воспла́чѹ себѐ и҆ приложѹ̀ бѡлѣ́зни, ѩ҆́кѡ ѕѣлѡ̀ ѡ҆горчи́хсѧ дѹше́ю и҆ смире́на є҆́смь ѕѣлѡ̀.

42 И҆ реко́хъ є҆́й: что̀ стра́ждеши; рцы̀ мѝ. И҆ речѐ ко мнѣ̀:

43 непло́дна бы́хъ а҆́зъ раба̀ твоѧ̀ и҆ не роди́хъ, и҆мѣ́ющи мѹ́жа лѣ́тъ три́десѧть:

44 а҆́зъ бо на всѧ́къ ча́съ и҆ на всѧ́къ де́нь, и҆ лѣ́тъ си́хъ три́десѧть молю́сѧ вы́шнемѹ де́нь и҆ но́щь:

45 и҆ бы́сть, по три́десѧтихъ лѣ́тѣхъ ѹ҆слы́ша мѧ̀ бг҃ъ рабѹ̀ твою̀, и҆ ви́дѣ смире́нїе моѐ, и҆ внѧ́тъ скорбѣ́нїю моемѹ̀, и҆ дадѐ мнѣ̀ сы́на: и҆ ѹ҆блажи́хсѧ ѡ҆ не́мъ ѕѣлѡ̀ а҆́зъ и҆ мѹ́жъ мо́й и҆ всѝ гра́ждане моѝ, и҆ почти́хомъ ѕѣлѡ̀ всеси́льнаго:

46 и҆ вскорми́хъ є҆го̀ съ трѹдо́мъ вели́кимъ:

47 и҆ бы́сть, є҆гда̀ возрастѐ и҆ прїи́де поѧ́ти женѹ̀, сотвори́хъ де́нь пи́рный.

<< ← Prev Top Next → >>